Market Insight：新股旺場趁機落鑊

與此同時，阿里亦令到日本富豪榜首換位，阿里巴巴真正大股東即揸住32.4%股權的日本軟銀，佢大股東孫正義當年的2,000萬美元的投資，今日價值暴升至580億美元，間接令佢成為日本首富，擁有資產達166億美元。

阿里上市，標誌着中國電子商貿發展的一個里程碑，由股市的認受程度及上市規模，阿里與騰訊（00700）雙雄鼎立的形勢更為清晣。

古勝冇點你

萬里長空

留意到，今次阿里打破一個傳統，近年大部分中資股在海外投資者眼中，多少沾上一定程度政治及經濟放緩風險，偏偏佢丁點兒影響都見唔到。

大孖沙開始做反手

周末，幾個美國財經節目，評論人簡直將阿里奉若神明，睇好理據大抵係投資中國電貿首選及由估值出發，阿里一五年市盈率33倍（計埋上周五升幅）比亞馬遜及Facebook的70倍及35倍低。老實講，阿里的高速增長可以維持幾耐，實在好難講，短線股價得唔得，純講供求。

上周五見到，兩個阿里巴巴真正大股東，日本軟銀及雅虎已有好消息出貨情況，收市倒跌收場，無視阿里直逼百美元大關氣勢。似乎阿里估值即使有二度，甚至三度發育，一班之前曲線炒軟銀及雅虎的大孖沙，早已心裏有數，開始做緊反手。

港股終於有技術反彈，上周五回升137點收報24,306點，蘇獨公投被否決，大不列顛有驚無險，保持完整，意味英國急住脫離歐盟的風險暫時可以擱下。英鎊匯價即彈，滙控（00005）升1.69%收報84.2元，成為升市火車頭，加埋騰訊在阿里掛牌前搶掃高1.8%，兩隻股票貢獻指數98點，已佔大市升幅七成一。

馬雲在香港路演之時，話最緊要 「股東開心」。古勝四圍八吓，問幾個有經私人銀行以house account入飛的朋友分配情況，撇除部分攞零，有幸分到阿里股的，都只係分到認購額的0.02至0.3%，最差嘅每認購5,000股先分得1股，真係得啖笑，講笑話沽貨仲隨時蝕埋min pay佣金。今次一班本地「專業投資者」蜑家雞見水，好自然又拎番港交所（00388）阻阿里香港上市單嘢出嚟插。

美亞有賣點可一試

講開新股，上星期五上市的新股神州租車（00699），估唔到基礎股東團夠硬淨，果然有料到，首日掛牌收10.96元，比招股價8.5元勁升28.9%，由於隻股票超額過二百倍，配售亦都分得好散，唔少基金盤上周五力掃，消息話短期升勢有餘未盡咁話。

睇番八、九月，港股表現麻麻，但意外地新股市場卻相當標青，就算唔數幾隻以倍數爆升的純配售私人派對，港銀控股（08162）、冠輝保安（08315）及朝威（08059），之前的創業集團（02221）、萬洲（00288）、博大綠澤（01253）及科通（00400），計至上周五，升幅亦介乎5至40%，真係有點始料不及。

嚟緊今個星期有嘉士利（01285）及強泰環保（01395）掛牌，中廣核美亞（01811）本周仲未截飛，呢隻賣點係過半數組裝機容量，來自燃氣、水電及燃料電池，食正可再生及潔淨能源條水，往績市盈率15至16倍，比已掛牌的電力股8至10倍貴，價值投資者未必落到手，但新股客應該可以諗吓，一來上市盤數整得幾靚，經營效率持續見改善，今次集資主要用作收購，擴大潔淨能源佔收入比例，係佢另一賣點。

發優先股刺激內銀

近日收到風，中國銀行（03988）可能係四大行之中，最早可以通過發優先股審批的一間。近期話就話美國退市，港美息口明年中左右，可能就見底回升，但一班專攻內房高息點心債及美元債的好息之徒，依然為內銀優先股興奮不已。聽到賓架消息話，6厘左右已經有相當大市場需求，同之前估計介乎7至8厘低一截，如果咁嘅話，可以估計第一批十月出籠，內銀股有好大機會因為消息炒番一浸，短期要密切留意。

古勝