富國銀行向來係巴菲特愛股，富國行政總裁斯通普夫日前出席活動時，就透露兩人第一次飯局嘅情況，大爆巴菲特原來好「重口味」。
食T骨扒灑鹽似落雪
斯通普夫話，嗰日巴菲特點咗份五成熟嘅T骨牛扒、芝士雞肉、薯蓉。當食物送上嚟嘅時候，巴菲特竟雙手攞起鹽罐，左右開弓狂灑鹽花。斯通普夫形容，情況就好似落雪咁誇張。
睇見巴菲特咁食法，斯通普夫都忍唔住告誡對方應減少攝取鈉質，同時建議對方考慮進行結腸鏡檢查，以保障健康。事實上，巴菲特二○○○年時喺例行檢查中發現結腸息肉，仲做埋手術割除。
巴菲特仲講笑咁話：「我入醫院時還有Colon（結腸，又解冒號），出院時就變成Semicolon（分號）了」。