絲絲講場：萬達太子爺晒新iPhone
iPhone 6今日（周五）正式開賣啦，如果之前透過iReserve搶到機嘅話，今日就可以去蘋果公司門市攞機玩。
不過，早幾日已經傳出依家有水貨機流入香港，前日仲傳有內地人喺先達用每部三萬蚊高價掃咗幾部iPhone 6 Plus，尋日中國首富、萬達集團主席王健林個仔王思聰就喺微博上面大晒iPhone 6 Plus，同早前喺先達賣出嘅係同一型號，唔通中國首富個仔都要嚟香港掃iPhone？
疑來港掃128GB土豪金
網上流傳話，先達廣場入面已經有幾間手機舖話已經有行貨iPhone 6搶先發售，但貨源不明。
而先達G-World Mobile負責人劉志剛（Lo哥）早兩日就收到兩部用嚟畀工程師做測試，俗稱「工程機」嘅iPhone 6 Plus即時畀內地人以每部3萬蚊買走，但就唔想多講貨源來自邊度喇。
向來出位嘅王思聰，尋日就忽然喺微博貼咗好多張金色iPhone嘅相，從相片判斷，應該就係128GB iPhone 6 Plus，但貼完相之後就畀網民圍插話佢炫富，跟住佢就立即刪番啲相，刪剩一張iPhone背面相。但佢嘅微博定位就顯示咗，原來佢依家身處香港，網友就估佢專程嚟香港掃機。
華強北炒價三萬人仔
有外電消息話，iPhone6嘅產業鏈，包括富智康（02038）在內產能不足，未來仍然供不應求，相信一眾炒家就最開心，市傳深圳華強北路最新報價，所有iPhone一律兩萬蚊人民幣起跳，5.5吋iPhone 6 Plus 128GB更開出瘋價三萬元人民幣，接近三萬八千蚊港紙，差不多係正價五倍，如果大家抽唔到機，就仲有排捱貴機了。
余絲韻