Market Insight：基金北上提振A股

對於耶倫慎審地處理市場對加息的睇法，其實唔算好意外，又咁啱得咁橋，近期美國兩個重要經濟數據，八月非農就業職位增加僅14.2萬個，是今年以來最少，亦係八個月第一次低過支持經濟增長的基本要求20萬個水平。加埋八月通脹，按月意外跌0.2%是年半以來首跌，按年升1.7%。在通脹低於聯儲局目標的2%之下，耶倫的確有條件可以繼續拖住先，避免錯估形勢，過早加息令經濟復甦趨頭逆轉。

九月股市大吹淡風

隔晚美股三大指數回升，惟昨日港股走勢弱到離譜，全日反撲乏力，收市跌207點報24,168點。雖然人行向五大內銀提供常設借貸便利（SLF），變相釋放5,000億人仔流動性的刺激，得一日貨仔就玩完。

古勝冇點你 2014/09/19

萬里長空

唔經唔覺，九月去到依家，港股得三日升市，數都數得出，包括九月一日微升10點；九月三日挾淡倉，大戶反手掃一些較A股有溢價H股挾倉，失驚無神挾淡掃高568點，同埋周三藉SLF消息進帳的240點，其他時間全部呈現陰陰乾情況。

除咗增長股唔掂之外，就連叻過一陣的電訊股、三桶油都有轉勢迹象，昨日比較搶眼的，就只得連日遭到基金摧殘的濠賭股，見技術性反彈，金沙（01928）股價升1.4%，銀娛（00027）升1.1%，連同新地（00016）升0.3%，50雙藍籌得3隻唔使跌，反映整體大市拋售壓力都幾全面。

中國電子（00085）宣布以每股1.63元配售3.38億股新股，佔擴大後股本16.67%，集資淨額5.35億元。資金無特別指定用途，股份昨日後牌開1.8元之後，炒上2.26元較批股價高出三成八，收市升幅收窄至4.7%報2.01元，比前日停牌前升4.6%。睇中期業績，呢間從事集成電路設計開發，提供解決方案團的紅籌企業，無突出之處，賺1.1億元按年增長4.9%，睇嚟今次批股又係私人派對嗰類，自己圍內玩晒。

等滬港通做齣好戲

包括古勝在內，相信唔少看官都等緊滬港通，睇吓阿爺點樣可以好好睇睇做場好戲，總理李克強早前講過，十月成事機會大。睇番十月七日前係A股長假期，以阿媽係女人的方式去推算，十月十三日、二十日及二十七日開通日子，機會各佔三分之一。

在下留意到唔少媒體為內地股民所作的調查，顯示內地投資者對買港股的興趣，唔似我們想像般大。事實上，從發出QDII配額中，已使用的大約僅佔三分之一，阿爺批准將北水南調的水管加粗加大，是否等於更多北水會流入香港魚缸搵食，暫時難下定論，也值得懷疑。

反而，見近期密鑼緊鼓為滬港通生意做準備的外資行，個個都傾向睇好南水北上的方向，可能帶來的機會。唔少陰謀論認為，這才是滬港通核心，一來為停泊在香港，人民幣離岸中心近9,000億元游資，製造實質人民幣需求，經此，內地可逐步推行資本帳開放，實為一石二鳥的部署，也同時可以為A股吸引更多外資，確立中國股市在環球市場地位，往後的好處唔使畫公仔畫出腸，可以預期如果滬港通成功，MSCI好難再搵藉口，繼續將A股摒棄於環球基金經理的benchmark以外。

盼引入機構投資者

滬港通消息曝光以來，對兩地股市影響分析，很多論點不容否定，當中可以肯定的，是AH股差價會因此逐漸收窄；一些內地市民熟悉但未有A股上市公司，如騰訊（00700）、中移（00941）及聯想（00992）等，其次是內地投資者較難接觸，海外收入主導的企業如和黃（00013），都會較受歡迎。

反之，內地機構投資者與散戶二對八的比例，與香港剛剛相反，形成一些選股偏好差異。內銀及內險等重磅股，A股每每較H股有折讓，預期北上的投資者會首先考慮。二○○○年以來，A股市盈率由高峰跌近八成，上證50指數成分股更跌了八成九，A股的PE大貶值，完成抵銷上市公司盈利增長，透過引入內地股市缺乏的價值型機構投資者，係咪能夠解決A股估值低殘的局面，是古勝認為這個巨大實驗，長遠最值得關注的重點。

古勝