滙豐○四年畀足禮金，迎娶中資行交銀過門，計落已經整整十年，喺前日北京舉行嘅合作十周年交流會上，雙方高層「家長」都以「婚姻」比喻呢段合作關係，當日仲舉行咗信用卡合作續約簽署儀式，延續兩行喺信用卡領域上嘅合作添！
雖然呢十年嚟，絲絲斷斷續續都聽過呢兩公婆離婚嘅謠傳，但交行行長彭純就闢謠話，雙方雖然歷盡十年歲月，但仍然處於「蜜月期」，唔知滙豐亞太區副主席兼行政總裁王冬勝喺台下聽到，係咪笑晒口呢？
交流會多猛人出席
講番當日，都好多人見證住呢段「蜜月宣言」，除咗嚟自人民銀行、銀監會同兩行企業客戶等等200幾人外，連滙控（00005）行政總裁歐智華都特登赴京，睇嚟呢段愛情長跑仲有排跑。
余絲韻