阿里巴巴唔落戶香港，近日傳媒不斷話馬雲就反而落戶香港，明年會攞到香港身份證，買定樓等移民，唔知係咪時間比較敏感，馬雲「拿拿臨」喺自己社交網站澄清，邊度都無諗住去，決意做個「杭州佬」。
馬雲一早就喺香港置業，經常嚟香港住吓，都冇乜問題啫。不過呢幾日傳媒都話佢就快移民，將馬雲氣急了，可能自覺「被移民」，阿里急急回應，馬雲自己亦係社交網站上面寫咗一大段野解釋。
馬雲話依家啲報道實在令人哭笑不得，佢自己從來無考慮過移民去任何地方，「我在杭州出生，杭州上學，杭州創業，一直都是杭州戶口」，仲話做「杭州佬」不知幾好，無任何改變現狀嘅計劃。
講到咁，人哋以為你唔鍾意香港喎！馬雲都好醒，補飛話佢熱愛杭州，但其實佢都好愛香港，亦好鍾意呢度嘅朋友、氣候、食物……最重要係香港係中國嘅一部分喎！計絲絲話，佢都好鍾意香港嘅記者添，今次阿里喺美國上市，就請埋香港近十間本地媒體齊齊過去睇「敲鐘」，非常豪氣！
阿里上市，舊股東齊齊套現，賺咁多，真係開心到四萬咁口，軟銀集團董事長孫正義仲開心，喺阿里嘅持股量咁高，帶挈佢連續五日位列彭博財富榜前幾位。
余絲韻