絲絲講場：滬港通擇日「1027」？
滬港通究竟喺十月邊個星期一開車，相信係股民依家最想知道嘅事。日前港交所（00388）主席周松崗被問到滬港通進展時其實已露咗口風，佢話希望滬港通喺十月底推出，滬港通喺「1027」（十月廿七日）正式開閘已呼之欲出！
周松崗露口風「十月底」
周松崗前日話，目前滬港通所有測試工作已完成，表現滿意，但就未敲定開通嘅具體日期，佢個人就期望可於十月底正式開通，港交所並且有信心喺預期時間內開通。
其實滬港通開車日期都唔係太難估，應該只有3個選擇，分別係十月十三日、二十日同廿七日，因為要揀喺周一開車。早前已有消息話，十月十三日開車，時間會較緊迫，故開車機會好低，二十日同廿七日「開車」，都係考慮之中，但當中以廿七日機會較高。
完成演習 等內地拍板
絲絲綜合各方面消息，依家喺「1027」開閘係最大機會，但當然仍待內地最後拍板。預計兩地監管機構將於十月初正式制，宣布滬港通通車日期。
依家交易所已完成市場演習，正等待券商回覆，確認已就滬港通準備就緒，市場預料大約會喺十月公布首批參與滬港通券商名單。
余絲韻