Market Insight：本地銀行股最Like加息

領導人嗰頭叫大家忍吓經濟陣痛，轉個頭又彈弓手開水喉，對一班等阿爺出手救命的股市玩家，好似睇到電視劇主角心跳停頓轉頭電番醒一樣峰回路轉的劇情，結果連跌八日的港股，昨反彈240點收24,376點，國指升175點收10,893點，滬綜指升11點收2,307點。

可能古勝杞人憂天，恒指於25,362點見頂，撻到落星期二低位24,117點，出動到放水都只係升兩百多點，睇落唔算強。當然，基金經理都怯於尚未清楚聯儲局主席耶倫於議息後的演說會否暗示提早加息的可能。

救經濟仍見步行步

出到SLF，意味中短期內由微刺激轉為強刺激，全面放鬆，例如全線降準甚至減息機會相對減低。睇番近期，中國經濟數據，從八月份製造業採購經理指數（PMI）、零售銷售增長、整體進口需求到固定資產投資，統統比估計差一截，到近兩日的全國發電量倒退，外商直接投資（FDI）急跌一成四遠遜預期，選擇唔透過公開市場操作投放流動性，夠唔夠力頂住第三季開始明顯放緩的經濟，似乎阿爺都係摸住石頭過河，見步行步。

古勝冇點你

萬里長空

然而，A股卻係擺出數據愈差，愈近阿爺出手的格局，向住高位進發。到底係A股股民睇錯，抑或阿爺怯於形勢比人強下，最終都要焗住全面放水，我等只能買定花生等睇劇情發展。

講番個市，受惠於SLF的內銀股，「中農工建」四大行升幅介乎1.1至1.9%。香港個人遊旅客消費轉弱唔係新聞，隨着內地反貪腐情況持續，大行對梳打埠的博彩業務表現，有打折再打折情況。昨日美銀美林將一五年博彩收入增長，由9.4%降至8.1%，當中包括貴賓廳及大廳賭枱收入，由原先估計升5.9%及15.1%，下調至5%及12.5%，兩隻藍籌博彩股逆市下跌，金沙（01928）跌3.8%，銀娛（00027）跌2.5%，在五十隻藍籌中排倒數一、二。

阿里難求 買番騰訊

阿里巴巴招股定價在即，騰訊（00700）終於企番穩，昨日股價上升2.4%，收報124元，阿里啱啱嚟香港路演，主理人馬雲仲話定價高低唔緊要，最緊要小股東開心，轉頭見市場反應好，將招股價上限推到68美元。果然同馬雲提出「顧客第一、僱員第二、股東最尾」的企業文化好鬼配合！

以27倍PE計算，比騰訊及百度的35至40倍低，以街外預估全年盈利增長35至40%計，看來是預留一定水位畀認購人有得走盞。

古勝問了幾個在私人銀行任職的朋友，佢哋話今次保薦行留唔少貨畀美國投資者及一些大型科技基金，本地客就即使經佢哋以house account入飛，分到的機會都唔大，要有心理準備得0.1至0.2%分配率，純粹得淡笑。照咁睇，阿里即使掛牌表現再勁，都益唔到本地股市玩家，短炒不如博番隻騰訊好過。

存戶基礎大有着數

執筆時未知耶倫會點樣以鴿派的說話，詮釋明年加息時間可能比市場預期第三、四季來得更早的傾向，有趣係美國第一次加息，斷估都係一年半載之內殺到埋身，但一些高息投資產品，好似完全無受影響，好似上周滙控（00005）發coco bond（或然可換股債券），最初話6.5至6.7厘，見最終超購N咁多倍，埋單以6.375厘定價，結果一開出見5.9厘，hot到離晒譜。

以往息升，最最敏感係呢類高息債，依家市場似乎唔多理傳統想法，總之有yield就追。

查實如果港美息口回升，一些存款客戶基礎夠大的本地銀行應該有着數，好似恒生銀行（00011）及中銀香港（02388），假設美國每加息0.25厘，每股盈利可以多3.7%及2.9%，依家兩股二○一五年預計股息率大約4.36厘及4.81厘，雖然話就話業績爆炸力唔係好勁，但點計，都抵博過隨時因為加息加得比預期快，賺息蝕價的coco bond。

古勝