絲絲講場：小加親征 滬港通登台
為咗「滬港通」可以去到幾盡？港交所（00388）行政總裁李小加就要「御駕親征」飛去台灣做宣傳，不過近期坑渠油事件搞到台灣同香港都滿城風雨，乜都唔敢食，希望李小加今次去台灣有啖好食啦。
訪台交所 溝通券商
小加去台灣呢個消息，港交所已經證實咗，佢呢個星期會去台灣參加一個研討會，仲會禮節拜訪台灣證交所及結算所。雖然事前冇對外界透露雙方會傾啲乜，但係人都估會講到依家如火如荼嘅滬港通啦。
其實小加「親征」之前都派咗先鋒出馬，呢幾日港交所人員已經到咗台灣見各大券商，講解滬港通運作模式同埋交易實務。
交流人幣計價商品
另一方面，市場亦都估計，港交所同埋台灣證交所會對人民幣計價商品嘅發行，進行更多資訊交流，有機會落實離岸人民幣業務合作。
不過，近期台港之間真係麻煩多多，原先香港人以為坑渠油來自台灣，點知兜個圈先發現原來個源頭係香港，搞到幾尷尬呀，希望小加總裁此行可以順順利利，為滬港通在當地響頭炮，攞多啲生意番嚟。
余絲韻