期指觀瀾：做好做淡如賭大細
風暴影響港股得半日市，恒指半日市開出抽過上24,405點，確認上唔返50日線24,452點樓上，之後全程級級落，以貼近全日低位收市，跌220點報24,136點，以半日市總成交581億元，居然只較周一全日市少13%，可見昨日現貨沽壓唔細，即月期指日市收24,183點，成交3.5萬張。
港股連跌八日，可是形勢上一如之前所指，聯儲局議息聲明於周四凌晨才有分曉，今日無論做好做淡，都要冒住賭鋪大細風險，唔想為入市而入市，索性等美息後向塵埃落定至諗點做好過。
歐洲方面，正注視蘇格蘭獨立公投，匯市反應流於悲觀，英鎊約兩個月時間由接近1.72插到早幾日1.61樓下，暫時民調顯示，公投成敗只係五五波。筆者本身對事件發展沒有個人睇法，可是留意到英國外圍莊家開出的賠率，維持現狀1賠1.25，蘇獨1賠3，一面倒盤口反映這班真金白銀受注的莊家，幾乎有一致的結論。
股匯市炒家可以睇錯，或純為避險做兩手準備，英國莊家這類專業到極的分析高手，在這類金融事件開盤，過去往績是準到無倫。
既然港股得個睇字，筆者反而有興趣賭吓英鎊在1.6算附近反彈。
John Mullen