渣打集團今年年頭開始重組業務，繼洪丕正四月份升做大中華區舵手之後，香港個人金融業務主管禤惠儀（Mary）下個月開始，亦都會升做大中華區個人銀行客戶部總裁，統領內地同港、台嘅個人銀行業務，尚明洋（Samir Subberwal）則會接佢棒。
Mary喺渣打做咗廿年有多，事業上一直平步青雲，○九年開始做香港區個人銀行業務主管。佢呢六年嘅戰績都幾彪炳，喺佢領導之下，成功提高產品市佔率，令到條Team每年收入都有增長。
其實Mary唔單止職場上搏殺，七月嘅時候亦都帶埋其他高層一齊去中學做老師，教學生理財知識、分享職場心得。
至於香港個人金融業務新揸Fit人尚明洋，之前成績都唔差，幫渣打德輔道中分行變身做數碼旗艦分行，交易廣場分行更加係中環新進地標添！
余絲韻