渡海濠情：生活困難 拍拖沒趣
最近北京做咗個調查，話今年大學畢業生嘅工資，平均只有二千四百元人民幣，咁嘅收入根本難以喺大城市生活，唔少大學生都焗住淪為「啃老族」，嚟自大富豪桑拿嘅KK就話：「咪同大學生拍拖呀！」
令人洩氣
KK話：「以前啲大姐姐出嚟做事冇耐，就會帶個大學生男朋友返屋企，成街街坊都會覺得佢好威水，所以我細細個時都諗過，第二日一定要搵番個大學生嚟做男朋友，但時移勢易，家陣啲大學生一街都係，真係一啲都唔吃香，我當年嘅中學同學，有好幾個年年月月寒窗苦讀，叫佢去邊度玩都唔去，幾經辛苦終於入咗大學，再苦讀四年畢業，但出嚟只搵到份二千零蚊嘅工，真係令人洩氣，相反有啲讀唔成書嘅同學，讀書時年年月月吃喝玩樂，後嚟中學畢業就出嚟打工，有人做洗頭仔，三年唔夠已做大師傅，底薪四千，再每做一個頭髮再拆佣金，旺季時月入過萬，仲有幾個去咗做快餐店，捱咗四年，家陣唔係店長就係經理，底薪三、四千起碼，每個月仲有獎金分添！」
乜都要錢
咁你揀男朋友會點揀呢？KK話：「家陣我肯定揀啲冇讀過大學嘅男仔啦！一來大學畢業生自己都養唔掂自己，邊有多餘錢照顧我呀！唔好多吖！出嚟拍拖睇戲、食飯、買嘢，每次一千幾百唔少得，唔通連拍拖費用都啃老爸老媽咩？佢唔要面啃得出，我都唔想咁做呀！所以我會揀啲已經有事業基礎嘅男仔比較好啲，而且大家都出嚟做嘢，傾嘅內容都會接近啲，而且正能量多好多，但同呢啲大學生拍拖，佢哋講嘢嘅內容，唔係埋怨老闆，就係埋怨父母，聽得多人都會負能量多啲，所以依家我一定唔會揀大學畢業生嚟做男朋友，但將來就唔敢講，你話十年八年後，一個係大企業經理，一個係快餐店經理，聰明嘅都會揀大企業嘅經理啦！但呢啲都係十年八年後嘅事，到時先再算啦！」
KK Profile
年齡：20歲
三圍：34-23-34
撰文：小德
攝影：阿德