金管局今個月嚟咗個大執位，三位助理總裁轉咗部門，睇開「銀行操守」嘅戴敏娜變咗睇「法規」；戴敏娜個位就由以往管「外事」嘅朱立翹坐，依家「外事」助理總裁個位就由李永誠頂上。
雖然調來調去都依然屬於助理總裁Ranking，唔算升職，不過絲絲認真要恭喜佢哋，做多幾個部門，等於磨利多幾張刀，儲夠幾張刀，有利升職嘛。呢幾個部門之中，「外事」最「好風水」，過往坐過呢個位嘅阮國恒同余偉文都已經升咗做副總裁，梁鳳儀仲上到副局長Level，連依家金管局總裁陳德霖都曾經做過外事部助理總裁。
副總裁余偉文管少樣
金管局就話，人事調動好正常，同事做唔同職位，可以見識多啲唔同嘅嘢，對職途都有幫助。
今次除咗執位，金管局個架構都有變動。副總裁余偉文以前管晒「外事」、「儲備管理」同「機構拓 展及營運」三個部門，儲備管理亦即係睇外匯基金。
唔知係咪考慮到外匯基金做多咗另類投資，合規相關嘅工作量又大增，依家最新安排係陳德霖幫手睇「機構拓展及營運」，等余總可以專心搞「外事」同「儲備管理」。
余絲韻