絲絲講場：小加陪馬凱巡LME
港交所（00388）行政總裁李小加自從一二年底以天價收購倫敦金屬交易所（LME）後，一直都唔算順風順水，一來LME捲入多宗被指操縱鋁價嘅美國集體訴訟官司，二來LME又開支使費大，未能生金蛋。近日李小加終一吐「烏氣」，守得雲開見月明，除咗LME打甩鋁價嘅集體訴訟官司外，小加日前仲威威咁陪同國務院副總理馬凱訪問LME。
高盛估港交所值197元
LME以往係英國歷史悠久嘅交易所，依家比港交所買咗，小加呢個時候陪同馬凱參觀港交所旗下嘅LME，小加應該別有一番滋味在心頭！
據了解，小加向佢介紹咗港交所同LME最新發展。兩人一齊參觀LME馳名國際嘅交易圈。交易圈係LME嘅公開喊價交易平台，係全球基本金屬價格發現過程中樞所在。今次馬凱係到英國出席第六次中英經濟財金對話期間順道訪問LME。
近期港交所因滬港通而股價走勢大勇，尋日高盛將其目標價由194元升到197元，睇嚟小加仲有排威！
余絲韻