絲絲講場：四叔掃恒地時機精妙
人稱「四叔」嘅恒地（00012）主席李兆基曾多次係公開場合講過「買地產股好過買樓」，今年以來就密密身體力行，最近一連八個交易日豪斥近10億元掃入「自家股」恒地股份，四叔持股量更升到67.5%。咁啱「四叔」呢次增持部署就係九月五號完成，似有意向投資者大派「定心丸」宣示對自己的地產王國恒基充滿信心，因九月五號當晚同系公司恒發（00097）便宣布向恒地以約9億3元，買入6間千色百貨公司。
恒發今次獲注資，即時引起市場人士再度揣測，係咪「四叔」分身家嘅第一步，同舊年「四叔」沽出煤氣（00003）、恒發及香港小輪（00050）等股權時同樣哄動。
不過，「四叔」仍然相當精靈，一早預計到市場人士又會亂諗嘢，今次唔再多費唇舌解釋，再次大手吸納恒地股份，埋單計數，八次交易嘅平均價都只係53.134元，對比尋日收市價55.8元，帳面獲利差不多5,000萬元，仲唔一石二鳥。
斥近10億買足八日
同時，心水清嘅投資者都記得，恒地今次出售千色店代價約9.34億元，計落又同「四叔」趁中秋節假期前、連續八日豪買恒地股份涉資金額約9.84億元差唔多。雖然依家千色店嘅交易仍未落實，但今勻資產左手交右手後，仲用自己手頭資金嚟捧自己旗艦股，恒地及恒發近日股價做好，尤其係恒發獲注資後連日做好，股價更一度創下三年半新高，四叔出招真係無得輸。
余絲韻