嚟自福建省嘅諾奇（01353），「締造」紀錄，公司上市冇耐，董事長丁輝就挾款失蹤，搞到公司股份七月開始停牌，更慘嘅係，福建好多企業即刻畀銀行關水喉，做服裝更係慘中之慘。老友話，呢波信貸危機唔講得笑，諾奇單嘢名副其實係累街坊之作。
絲絲喺福建嘅老友慨嘆，唔知過唔過到年！佢話，當地好多企業老闆，都聽到銀行下達指令，紡織服裝行業嘅貸款額度要收緊。
尋日內地嘅《證券時報》，亦引述泉州服裝紡織商會副秘書長施正值，話「老闆走佬」事件，引發信貸危機，福建省內甚至泉州地區嘅銀行借貸和民間借貸都變得異常謹慎。
據講，當地有啲貸款公司都轉變策略，只做有抵押嘅借貸，唔做擔保，就算抵押，都要打好多折。唔少福建銀行業界，都畀銀監部門約談，「風聲鶴唳」呢四個字，已鑿喺額頭上。
余絲韻