Market Insight：加息升溫 避險為上

近日債市開始怕耶倫在下周議息，先在聲明刪除維持起低利率「for considerable time」三隻字，為出年開始加息做準備，會唔會喺今次出手都好，下周議息前，相信基金經理避險減磅在所難免。

先利申，古勝乃「果粉」一名，近幾次每次keynote發布會，但凡有直播，都會漏夜守住部電腦前面睇到散場，但從未試過好似前晚咁，蘋果公司即使谷到伺服器容量應付全球網絡視頻直播，一樣頂唔順全晚睇吓窒吓，可見今次蘋果公司終於向市場屈服，轉攻大屏幕iPhone，市場有幾咁重視。

古勝冇點你2014/09/11

萬里長空

高調洩密弄巧成拙

蘋果公司喺發布會順便講埋明年會推出腕錶，有留意網上「流言板」的，都唔會太意外，反而全晚爆大冷係全球第二大經濟體中國並不在新一代iPhone首發地區，三隻電訊股，中移（00941）失紅底股身份，昨跌2.5%收報98.7元，中電信（00728）跌3.4%收報4.99元，聯通（00762）跌3.3%收報13.44元。

三大電訊股巨頭失威，立即見到唔少內地媒體即刻出嚟造條金樓梯畀佢哋做下台階。有個說法話工信部未批到兩部新機的入網許可證，所以三間公司唔賣得住，亦有認為內地VoLTE1網絡未完善，蘋果公司唔想影響用戶體驗索性唔揀內地首發。

實際係咪咁簡單？睇前晚Keynote，蘋果公司破天荒加埋國語傳譯，舵手庫克（Tim Cook）有幾重視中國市場已經畫公仔畫到出腸。

之前的iPhone 5代及iPad Air，祖國都係首發市場，反而今次落空，講到底，近日中電信及中移先後趁重視新產品保密的蘋果公司出機前，不斷大玩洩密，新機規格、原圖統統唔理保密協議落到齊，仲偷步接受預訂，蘋果公司對住無合約精神的做法，唔嬲有鬼。

阿里風騷 騰訊憔悴

據知三間公司合共收咗近11萬部手機預訂，預留網頁昨日無端端被消失，此地無銀，臨門撻Q的原因也呼之欲出。姑勿論點，就算遲一兩個月開賣，斷估在華銷售都唔會差得去邊，但成件事最大得益者，肯定係本地炒家，今個星期五又齊齊玩大抽獎遊戲。

前晚美國科技股走勢麻麻，但對預計下星期掛牌的阿里巴巴的招股氣氛卻無大影響。消息指首輪路演，儘管散戶興趣一般，可是美國當地科技基金出奇踴躍，投行消息話認咗頭落飛的大孖沙，今日會有2至3倍超額認購申請，保薦行考慮將60至66美元的招股價上限推高2美元咁話。

到底堅定流無法證實，意外反而係騰訊（00700）弱到極，昨日又隊低3.2%收122元。照計估值大家差唔多，一個香港，一個美國上市，股東結構唔同，照計就分散投資，減磅去換貨的基金應該唔多，睇走勢，120元係七月初起步位，亦係近一個月的圓頂派發頸線，宜守不宜破也。

依家全世界都有磚頭貴、股票貴（講緊歐美股市）、債券貴的情況（連財政經濟穿晒窿的西班牙，十年債息都落到2.19厘仲低過美國），掉番轉頭，其實都講緊銀紙唔值錢，話就話美息短期可能進入上升周期，但有趣是，高息企業債券近期所見，卻完全無有怕一樣。

滙控再跌水位唔多

昨日滙控（00005）發兩隻永續債券，其中二○二四年non call的一隻Baa3級美元計價債，叫6.5至6.75厘，在下聽到一個上晝經已比預定發行額超購6至7倍，以近排歐洲銀行的永續債發行表現一般，市場反應有點出奇咁好。

查實如果美國真係進入加息周期，當地資產質素繼續改善的話，本地兩間跨國銀行，滙控同渣打（02888）相比，前者條件較為佔優，話就話跨國銀行面對top line營收部分無乜增長空間，以慳皮及唔再畀政府罰錢為首要任務，睇番滙控今明兩年的預計股派息率有4.9厘及5.3厘，如果債價可以繼續維持現時高位，咁以現時高於歷史平均一截的預計股息，相對上，現價可跌水位亦應該唔多。

古勝