絲絲講場：稅局面前冇免費午餐
好多人都知道，美國硅谷科技巨擘好似Google、facebook同Twitter都會為員工提供免費食物，豐盛嘅自助餐同埋Pizza可以話係佢哋嘅指定動作，真係恨死好多打工仔。
但呢個業界文化竟然被美國稅務局（IRS）盯上，認為呢啲「免費午餐」應該屬於應稅福利，考慮加大力度追收稅款，可能相當於食物市價嘅30%。
其實稅局想向呢方面開刀都唔係新鮮事，IRS同美國財政部上個禮拜整咗份最新財政年度優先徵稅項目名單，排頭位嘅正是「僱主提供膳食」，當局仲話會就此發出新指引，但冇透露時間表或指引內容。有意見認為，由企業提供免費食物而毋須課稅，會對經濟造成扭曲，並且為部分僱主帶來不公平優勢。
新指引勢惹民怨
不過，若果稅局真係出手，肯定會畀人話係對關鍵行業特有文化嘅一種干預，勢引發「民怨」。
其實，僱主為員工提供食物，除咗係一種福利、促使員工交流同有助士氣之外，亦有更實際嘅考慮，包括可以讓員工僅花20至30分鐘用餐，之後便可回到工作崗位，部分企業亦可能希望避免員工喺其他食肆談論公事，可以話係互惠互利。
余絲韻