安達信會計師事務所（Arthur Andersen）十二年前因捲入能源公司安龍做假帳醜聞而沒落，但一班安達信前合夥人依然念念不忘，斥資買入呢個有百年歷史嘅嘜頭，繼而將經營緊嘅稅務顧問公司WTAS易名為安達信稅務（Andersen Tax），讓安達信「復活」。
當年擔任安龍核數師嘅安達信，喺政府開始調查安龍帳目時銷毀文件，於○二年被控妨礙司法及被定罪，令安達信聲名狼藉，雖然法庭於○五年推翻裁決，但已無補於事。WTAS行政總裁沃爾沼茨於十二年前與另外二十二名安達信前合夥人組成新公司，亦係佢主導今次行動。
俗語有云，唔怕生壞命，最怕改壞名，安達信個朵已經「臭」咗，更重要嘅係，安龍事件揭發安達信許多內部問題，沿用佢個嘜頭會唔會冒險咗啲呢？
不過，沃爾沼茨力撐安龍事件只係少數人嘅責任，唔代表整家公司都有問題。佢仲期望借安達信嘅名氣拓展美國以至海外業務版圖，挑戰四大會計師樓喺稅務顧問業務嘅地位，預期全年收入將由今年超過2億美元，增至一五年介乎2.75億至3億美元。
至於時間係咪真係可以沖淡一切污點，真係要睇過至知。
余絲韻