絲絲講場：金融調解CEO離奇唔撈
因為雷曼迷債事件而觸發成立嘅金融糾紛調解中心，自從一二年中正式開檔後，由於接獲嘅調解服務申請個案不算多，中心一直都幾低調。但近日就有一單嘢吸引絲絲注意，就係佢哋位CEO詹少弘突然冇撈！詹少弘任期原本應到明年三月，換句話講，金融糾紛調解中心首任CEO做唔完任期就離職。
聲明「劃清界線」
上個星期五，金融糾紛調解中心網站突然出咗詹少弘離職啟示，表示佢已於當日離職，但最特別都要算份聲明表示：「今後詹少弘在外之一切華洋轇轕，概與本中心無涉，特此聲明。」
絲絲當然要打電話了解一下，金融糾紛調解中心發言人只係話，有關離職係詹少弘同董事局商討後的安排。對於因乜原因就不作評論。
即刻登廣告請人
詹少弘係大律師，二○一二年三月被委任為金融糾紛調解中心首任CEO，任期3年，即係話明年三月至到期。
中心發言人話已物色緊接任人，暫時管理層會處理有關工作。中心個網站就顯示，佢哋喺八月十八日登載公開招聘行政總裁。
金融糾紛調解中心主要工作係以「先調解，後仲裁」方式，協助解決金融機構與客戶之間的金錢爭議。
余絲韻