Market Insight：A股旺場翻炒折讓

滬綜指昨升1.37%，創下15個月新高，滬深兩市合共成交金額3,678億元人仔，亦創今年新高，計埋匯率，成交為港股6.5倍。咁大成交，升市唔使多講理由，淨係話資金流入已大條道理，流入原因亦好自然歸功於滬港通。

內地傳媒列舉其他四個原因包括：新華社連續發文撐股市、打新資金回流股市、經濟數據弱將迫使央行減息或降準、習近平要求推進軍事創新利好軍工股，其實全部原因都相當虛幻，只係事後孔明，見個市升就搵一大堆理由。

無可否認，自從滬港通宣布推出之後，A股立時轉咗勢，尤其一眾冇散戶吼之藍籌股如脫胎換骨。不過，推動A股上升的另一個原因，是中國經濟數據轉好，PMI曾連升五個月，資金追捧落後之A股順理成章。然而，七、八月經濟數據如接受「冰桶挑戰」般，一盆冰水照頭淋。傳聞八月份新增貸款亦未如預期，突然轉差的原因，同七月打咗隻大老虎有關。

古勝冇點你

萬里長空

提早炒定深港通？

原本諗住打貪會略為收手，點知八月更為落力，現時內地官場人人自危，紛紛謀定後路。現下中國政治波譎雲詭，以投資者厭惡風險的性格，滬港通點勁法都難引起興趣入市，但翻玩「愈墮落愈快樂法則」（經濟數據愈差，愈有條件減息），就任佢點玩都得。

外資睇好中國股市根本毋須等待滬港通，QFII及RQFII額度仲有一半未用，而港股近日雖然沉悶，但滬港通概念股再度翻炒，據聞滬港通測試順利，券商股及AH折讓股乘勢發威，信達國際（00111）昨升8.3%，兩隻深圳同步上市股份山東墨龍（00568）和浙江世寶（01057）均升逾6%，咁快已炒埋深港通。

當正式開通之後，將更上一層樓抑或散水到時先知，但要散水者不會等到十月開通前夕，九月下旬就會先遁。昨日另一特點是炒細唔炒大，A股ETF孖寶南方A50（02822）及安碩A50（02823）合共成交僅約32億元。

中移股價隨時見頂

除滬港通主題之外，昨日最矚目的是iPhone 6概念，但不再是瑞聲（02018）及舜宇（02382）等手機設備股，而係內地三大電訊商，原因是預先訂購反應相當踴躍，中移（00941）、聯通（00762）及中電信（00728）齊齊再創52周新高，升幅有2至4%。

中移已上到98蚊，距離「紅底股」不遠矣，但相對不足半年前一沉百踩，跌到最低63.65元附近；同係季績倒退，大行變臉之快嘆為觀止。中移從低位累升逾五成，作為公用股，息率降到得3厘，同內銀股差得遠，「見紅」亦隨時見頂。

iPhone 6將於下周二亮相，據稱聯通4.7吋及5.5吋合約預訂價分別為5,288元及6,288元人民幣，北京中移已有逾萬人預約，證明「果粉」引頸企盼已久。iPhone 6未出先轟動，但佢舊「i雲」則引發荷里活女星裸照春光乍洩，網絡安全問題可能成為關注點，未必一定遺留手機或攞去維修才有機會洩密，擺落舊雲度亦隨時走光。

中國方面早前已禁止公務機構使用蘋果公司產品，原因就是安全問題，而有加密功能的一款酷派（02369）手機則被搶購一空。雖說限制僅限於官方而非民間，但如果中美關係一旦轉差，蘋果公司產品隨時首當其衝，如早前的IBM和微軟產品命運相同。炒iPhone概念同炒滬港通概念一樣，事前好過事後，iPhone 4及iPhone 5早有樣辦。

股民做好兩手準備

五大國有銀行A股均升逾1%，但H股則僅交行（03328）有得升。同樣一份業績，但香港投資者更關注不良貸款和不良貸款率雙升的問題。而銀行高層減薪一半亦講到似層層，如果是有料之人，劈炮亦不愁冇人請，外國的銀行家年薪隨時以億計。不過，內地銀行屬壟斷性行業，飯來張口，且「灰色收入」更和味。現在中國打貪不手軟，灰色收入減少兼要大減薪，「賓架」可能向自己發購股權激勵士氣。

明晚輪到歐洲央行議息，QE如箭在弦，美元資產再受市場青睞，又有人吹歐元於年底跌到1算，但近日港股陰陽怪氣，看官要做好兩手準備。

古勝