孖妹S檔案：滬港通大小戶講到通

海通國際：不惜工本開專題講座

許：海通國際（00665）執行董事 許儀

彩兒：中資券商力谷滬港通，你哋又有乜法寶？

散戶 Pasu	散戶 Richard	彩兒、Kitty

許：我哋計劃今個月起不惜工本，每個月搞一次大型A股專題講座，仲會搵母公司海通證券（06837）嘅專家來港坐鎮，為滬港通潛在客戶講解最新A股行情！好似今個星期六咁，就請咗海通證券首席投資顧問彭孝影，喺灣仔會展講兩場A股專題講座。實際上，七月起我哋每個月都會搞一大兩小嘅投資者教育活動，預計年內相關支出超過200萬元。

IT升級 增聘A股專家

Kitty：為咗滬港通，你哋可以去到幾盡？

許：為咗將機構客戶同零售客戶分流，又要為中、小型本地券商提供B2B模式嘅免佣駁腳服務，公司增設咗兩套滬港通專用網關（C`COG），每套索價近15萬，未來仲要視乎客戶嘅反應增加節流率（Throttle，俗稱水喉），預料系統升級支出大約都要100萬至150萬元。

因為滬股通交易規則獨特，例如無即日鮮、股份編號係六位數值，我哋動用IT部近廿人由四月起設計支援滬股通嘅交易、結算、客戶管理及帳目等系統，仲有手機應用程式（App）添！

彩兒：你哋仲有乜嘢升呢計劃？

許：海通國際同母公司都係上咗市嘅中資品牌券商，兩地研究所已展開緊密合作，希望可以為客戶提供第一手A股分析資料，未來仲計劃推出人民幣孖展服務。其實擁有內地投資牌照嘅人士喺本港市場相當渴市，雖然公司目前已有約350位股票經紀，但我哋仲會積極聘請相關人士同熟悉內地市場嘅A股專家。

股民：等A股回調買信証

P：散戶 Pasu

彩兒：你平時玩美股咁叻，滬港通概念股你又炒唔炒得掂？

P：我年內整體投資回報達35%，賺咗過百萬元，因留意到滬港通嘅機遇，就喺中山開內地證券戶口投資A股，實行利用中港兩地戶口同時包抄！不過之前忙住籌備婚禮，七月底先開到A股戶口呀！我首輪買入中信証券（A股：600030）同中國太保（601601），八月中減持前者及沽出後者獲利。我較睇好盈利增長受惠滬港通嘅股份，特別睇好行業龍頭中信証券，顧及佢A股平過H股，會等滬綜指回調到2,130點再增持。

Kitty：炒A股係咪好難？

P：A股術語真係好難明，但勝在佣金特平，只佔交易額約0.0003%，我暫時計劃今個月繼續炒A股。一旦滬股通玩法係可以即日鮮，就會搬資金返香港炒，始終統一戶口易管理。內地市場冷落大型股，因而出現折讓，相信折讓會因國際資金流入而收窄，所以我會先炒相關股份。

彩兒：港股你又點部署？

P：滬港通概念炒到「爛爛哋」，近期A股調整，拖累國指走勢，而我又睇淡H股較A股有溢價嘅股份，所以沽空緊國指及華能國電（00902）。

時富金融：與內地同行互補「火力」

鄭：時富金融（00510）投資服務部行政總裁 鄭蓓麗

Kitty：滬港通就快殺到，你哋身為本地行有乜準備功夫？

鄭：自港交所（00388）宣布滬港通措施後，我哋就密鑼緊鼓同上海及深圳嘅友好券商聯手，互換港股與A股專家向員工進行培訓，同時交換中港股市嘅研究資料，各展所長，率先嚟個資訊上嘅滬港通。公司仲有計劃為網頁大變身，增加放置滬港通可投資嘅股份研究報告。

現時我哋都Keep住增聘銷售同電腦部員工，目前旗下內地客戶約佔整體四成，滬港通效應令內地人對港股興趣提升咗，所以希望相關客戶可以再有兩成增長。之前仲特登請咗幾位普通話「嘞嘞聲」、香港畢業嘅內地財務碩士畢業生，佢哋依家輪流試緊客服、結算、盤房及風險管理部門等崗位，目的係訓練佢哋成為專門湊內地客嘅尖子。

擬送金幣吸中國大媽

彩兒：因為法規問題，你哋無內地分行，咁點吸內地客？

鄭：公司銷售部同事會招待內地客戶團來港開戶、參觀辦公室同港交所，佢哋會陪足全程，即使係購物，甚至去海洋公園玩都會陪伴在側。我哋遲啲仲想送金幣當見面禮，吸引中國大媽開戶添。

Kitty：你哋會唔會減佣金吸新客？

鄭：公司現時0.1至0.25%嘅佣金價格合理，再打佣金減價戰只會壓低盈利盞淒涼，我哋更想用服務吸客。為咗令內地客戶網上落盤線路穩定無阻，公司特地喺香港辦公室鋪設互聯網專線，連接深圳與上海嘅後勤辦公室，同時加大「水喉」（節流率），唔需要客戶自行「翻牆」落盤；另外最近仲搬遷及擴充深圳辦公室，支持未來繼續吸客。

股民：擬$165翻啅港交所

R：散戶 Richard

Kitty：你今年整體投資回報有50%，究竟點做到？

R：我一向信奉「順勢投資」炒股心法，港交所（00388）喺滬港通下升級為「全國賭場」嘅主人，措施促進資金南下，勢提升香港市場成交，公司屬直接得益者，贏面大，可見港交所係有買貴冇買錯，所以我喺股價約140元時大手掃貨，之後喺約175元起分段止賺，直至約185元完全出貨獲利。等調整到165元左右，我就會考慮再次吸納。

另一方面，「創新高股是散戶明燈」都係我嘅至理名言，八月初跟隨呢個理念，喺第一上海（00227）突破1.2元時入市，並於1.5元以上分階段止賺，呢兩隻股份嘅回報都有成20%。

彩兒：咁你遲啲會唔會利用滬股通炒A股？

R：內地貪腐問題令我憂慮，我用月線圖觀察南方A50（02822）及安碩A50中國（02823）仲見到下降軌，推斷A股暫時唔會大升，再者，滬港兩地交易規則唔同，又未傾掂數，港股選擇夠晒我玩，所以對A股完全無興趣！

Kitty、彩兒

若有料報畀彩兒同Kitty或有嘢問，可電郵money.biz@on.cc