絲絲講場：日股免稅瞄準「細路」錢
東京仍然係環球主要股市之一，不過日本人對股票無乜興趣，《華爾街日報》引述消息話，日本政府打算將投資免稅範圍擴展到19歲或以下人士，即係連啱啱出世嘅BB都唔放過，莫非當局想佢哋一出娘胎就衝去炒股？
非也，當局其實係想增加小朋友對股市嘅認識。據悉，日本金融服務局打算明年一月前將19歲或以下嘅公民納入日本個人儲蓄帳戶計劃，如果佢哋投資股票或信託基金少過80萬日圓（約5.96萬港元），股息同利潤都免稅。
投資僅佔家庭資產14%
可以想像，正常情況係父母幫小朋友開個投資戶口，再幫佢買賣。換言之，計劃另一個目的係吸引更多散戶入市。
據日本央行統計，就算依家利率低到無人有，日本人都係寧願擺舊錢喺銀行都唔投資，截至去年底，股票或基金佔日本家庭金融資產嘅比例得14%，遠低過美國同歐洲分別45%同24%嘅比例。
余絲韻