Market Insight：潤燃長線值得吸納

既然連主席都話難估，古勝等升斗投資者，就更如丈八金剛摸不着頭腦。最抵死係耶倫仲將有雞先定蛋故事發揚光大，話如果就業市場好到吸引閒置勞動人口，重投就業市場，勞動參與率上升又將會限制工資上升，聽到呢度，真係張三豐都要認番佢做師傅。在下認為美國加息仲係有拖無欠，就算加都幅度唔大，況且歐洲及日本近期的經濟數據認真油麻地，睇嚟距離下次印錢唔遠矣。

港股強到無朋友，昨日早市畀A股拖累咗一陣，下晝由滙控（00005）、中石化（00386）帶番個市倒升，升54點報25,166點，以7點之差破了上周三造出的海嘯後收市新高紀錄。藍籌有22升25跌，整體大市升跌比例，就更明顯見資金的側重，升跌分別係643同807隻，跌的股票比升的足足多四分一。

恒隆押注內地市場

消息股方面，上周話香港電視（01137）可能有計，昨抽升3.7%收報3.01元，完全補晒三月同阿爺買咗流動電視牌之後，又因為法律爭議唔用得，股價急插留低2.43至2.96元的下跌裂口。睇成交，劇迷可能真有機會睇《警界線》第二集。

古勝冇點你

萬里長空

周末，「坐貨王」恒隆系收起浪澄灣準備放賣君臨天下貨尾，睇見價單連同各類折扣，唔高得○九年開賣時好多，對比過去五年來港樓升得咁癲，都算樓市怪象。當然，人人追住上車盤，反之豪宅在辣招下，交易成本大升，無升得咁多亦係事實。

不過，恒隆多年來唔補充土儲兼間中賣吓貨尾，擺出淡友姿態，沽貨難免令人聯想到睇唔好後市，影響套現能力。睇番一門雙傑恒隆集團（00010）及恒隆地產（00101），今年分別升得13.4%及4.9%，同長實（00001）升20.9%、新地（00016）升19.6%、恒地（00012）升27.2%及信置（00083）升32%一比，輸緊幾條街，順利清貨的話，可以疊埋心水，將來睇佢內地項目的發展掂唔掂。

淡友誇大負面因素

業績股繼續成為焦點，華潤系流年不利，華創（00291）連隊三日未止瀉，華潤燃氣（01193）中期業績升17.2%賺12.51億元，上半年銷氣量升9%至68.16億立方米，本來數字同大行預測差唔多，昨股價一度插低12%，主要受管理層大幅調低一五年銷氣量目標達兩成，由200億立方米降至160億立米方米所致，而調低的40億立方米銷售額，大部分來自與天津津燃（01265）合營項目，管理層直言銷售表現未達預期，上半年也處於虧損。

中央大力鼓勵清潔能源應用，管道燃氣需求持續上升，現時內地天然氣在能源使用上，滲透率偏低，相對其他能源的自然增長亦都較快。以美銀美林更新後的預測，潤燃今明兩年純利27.36億及32.94億元，每股盈利1.23元及1.48元。

潤燃一四年PE 19.1倍，比新奧（02688）及中燃（00384）的22至23倍，最少有13%折讓，以26%及20%以上的盈利年增長，因為調整本來表現麻麻的項目銷氣預測引發急跌，似乎為長線投資者提供低吸機會。

跟住資金流向搵食

昨日大市先跌後回升，但見到升浪之始表現最佳的中資券商股卻普遍低收作結，如海通證券（06837）跌0.6%、中信証券（06030）跌1.2%、申銀萬國（00218）跌6.5%、第一上海（00227）跌6.3%、國泰君安（01788）跌1.2%。到底呢個現象係預視本輪升市已屆強弩之末，抑或資金在流出超買的中資券商股，重投落後的醫藥、新能源及科網等板塊的懷抱，相信過了本周期指結算，資金流向將更明顯！

事實上，近日醫藥及新能源股表現都有起色，昨日尤以風電股金風科技（02208）登上主板升幅榜第二位最受關注，收報12.1元，升幅28%。

不過，要知道，統稱為風電股，其實都有分做上游定下游，做製銷風電設備同做風力發電係唔同，風力發電一則要睇「天」，二來又要睇風電上網價政策，反觀國策鼓勵新能源建設，增加清潔能源比重，風電投資增加，帶動風電設備需求，風電設備商可坐享其成，金風逾八成收入是來自風機及零部件銷售，大行唱好亦自必有其因。

古勝