程式交易啱晒「大忙人」

陳：散戶陳先生

余：散戶余先生

張：散戶張先生

Kitty：彩兒你愛穩陣，偏向股神巴菲特嘅價值投資法；我就鍾意睇圖表，研究吓「陰陽燭」同「日/月線圖」。睇嚟喜歡程式交易嘅投資者，同我嘴型夾啲喎！

陳：我覺得技術分析公平啲，因為個個投資者睇到嘅嘢都一樣，無得呃人。我從事貿易生意，經常都要中、港兩邊走，邊得閒「睇市」吖！所以程式交易好適合我，幾年前聽完相關講座就開始學，設定晒啲投資策略後，佢就會自動幫我止賺止蝕，可以免去好多人為錯誤。

我覺得，投資輸錢嘅人，好多時係輸心理。所以就算係屋企人，我都同佢哋約法三章，投資方面好少提亦好少畀意見，因為唔想影響對方嘅投資意向。

策略自動化 唔靠貼士

余：雖然我依家仲係學生，不過我唔會介意同家人交流心得，我自己係以目標為本，希望程式交易可以做到年投資回報三至四成，甚至幾年後儲起筆「首期」可以置業。

張：我係澳門人嚟o架，對投資好有興趣，以前都去過唔少講座，試過各種投資方法，但始終認為程式交易比較可靠，最適合自己，所以都唔介意專程由澳門嚟香港旁聽。以前成日都要睇住個市，好緊張，但依家唔需要再好似以前咁靠市場消息，亦已經好少再聽股評人嘅揀股建議。

彩兒：正所謂「學海無涯」，各位股友揀股前，不如先揀個合適課程，進修吓投資知識仲實際！