孖妹S檔案：炒股諗新橋 勤聽投資Talk

滬港通尋寶熱中之熱

Kitty：彩兒，原來眨吓眼暑假又完，今年剩返四個月咋！最近港股勢頭唔錯，不如快啲諗下計，點將我哋嘅投資回報最大化啦！

彩兒：正有此意！我已經做足功課，Mark低各類型投資理財講座。就由城中熱話的「滬港通」開始先啦！

部分即將舉行的「滬港通」講座

林日文冀藉講座讓散戶了解借出股票收息的策略。

彩兒：剛剛聽完HKUSPACE舉辦嘅「滬港通」投資講座，有城中知名基金經理助陣，吸引逾五十位唔同年紀嘅投資者出席。佢哋又抄筆記，又影Powerpoint，非常認真，喺短短兩小時孖妹都獲益良多！唔知啲投資者又吸收到幾多？

李：其實都未完全明白，太多嘢一時間好難消化。我知道「滬港通」會帶嚟投資機遇，但唔識部署，所以都想聽吓，希望唔會太遲啦！

勞：身邊個個都講滬港通，所以我想認識吓，可以多個話題吖嘛！我毫無投資經驗o架，但聽完今次講座，對「滬港通」了解多咗。

「投資俠侶」愛追財星

Kitty：咁你哋又有無偷步買入個別A、H差價股先？

李：無啊，只係手持少許A股ETF（交易所買賣基金）！雖然我投資年期達十四年，但主要以月供形式買入高息股，平日要返工，邊得閒捕住個市丫。嚟緊都會去其他滬港通講座，認真研究吓投資策略。

勞：我真係無乜投資底子，會考慮報讀相關投資課程。不過，我英文基礎唔好，如果導師講英文我怕聽唔明，睇嚟都要學好英文先。

Kitty：彩兒，你見到講座有好多「投資俠侶」嘛？如果我將來嘅男朋友都鍾意投資就好喇，可以多番啲「奶粉錢」。我仲八卦到，頭先有對夫婦，原來係呢位基金經理嘅超級「粉絲」，佢嘅每場講座，佢哋都會去捧場o架！

鬼馬概念教理財新招

坊間唔少券商，為幫助散戶增長投資理財知識，都會定期舉辦相關講座。佢哋除咗實行小班教學，仲會諗啲新奇有趣嘅題目嚟吸引股友。咁抵得諗，孖妹都忍唔住要畀個「讚」！

「中女」理財 高息特訓

區：輝立理財顧問（香港）副總裁區智遠

Kitty：點解要特別為「中女」開班呢？唔係個個都好似我哋咁思想Open，你唔怕嚇走啲學生咩？

區：點會呢，其實「中女」一啲都唔貶義，係指一班既獨立又有智慧嘅成熟型女士，況且女性嘅財富管理能力比男性強，好多男士已經唔介意將財政大權交畀另一半。

一般而言，女性傾向投資低波幅高息產品，如高息股及債券基金。我相信，如果按市況制訂策略，再配合適當投資平台，佢哋將會比其他人早十至二十年享受退休生活。

社交網股要炒得「瀛」

許：輝立証券觀塘分行副經理許家東

彩兒：最近有位日本朋友介紹咗個日本社交網站COOKPAD畀我，專門畀「煮家」交流煮食心得，圖片相當吸引！可惜我唔識睇日文。

許：COOKPAD係日本上市嘅社交網站股之一，其他同類股票仲有GREE、Mixi等。過往多隻大型社交網股上市時，都對全球股市有一定影響力；適逢阿里巴巴下月上市，所以近期想講吓啲日、美上市嘅同類股份。

不過，大家始終都係對Facebook、Twitter呢啲美國上市嘅大型社交網站股較有興趣。

沽家借貨 另類收息

林：輝立証券借貨沽空部經理林日文

Kitty：「不勞而獲、財息兼收」？呢個講座主題咁搶眼，我鍾意！但真唔真o架？

林：當然係有少少Gimmick啦，但亦希望吸引啲對沽空股票有興趣嘅散戶，向佢哋講解借出股票收息嘅程序及策略。

以前個講座喺大會議室舉行，但散戶比較怕醜，所以都係用返小班教學好啲！

彩兒：聽聞出面無乜券商會「問客借貨」，所以一般散戶都唔係好了解。至於咩係沽空？孖妹早前先教過大家做「空軍」，相信股友們都已經學識咗啦！

彩兒 Kitty

若有料報畀彩兒同Kitty或有嘢問，可電郵money.biz@on.cc