絲絲講場：林一鳴升呢做鐵人
林一鳴（Eddie）由中信証券國際跳咗去上市公司漢能太陽能（00566）做財務董事，工作性質同環境轉變幾大，不過作為一個博士後同投資專家，應該沒有甚麼財務工作難到佢，唯獨有件事就令佢有啲頭痕。
返新工「過海」難跑步
講緊嘅就係點樣跑步返公司。查實Eddie好鍾意跑步，玩咗馬拉松好多年全行都知，鍾意嘅程度甚至令佢可以喺屋企渣甸山跑返去港島區Office，但問題係新公司總部喺九龍ICC，Eddie話真係冇辦法，惟有星期六日跑多啲步，加操補數。
大家可能覺得Eddie已經好勁，事實上佢近年不斷挑戰極限，升呢玩埋三項鐵人賽，游水、踩單車都包攬埋，佢話幾個月前先玩完三項鐵人賽，成績都OK，絲絲問佢會唔會想拎第一名，佢話：「唏……幾十歲人唔會爭第一第二o架喇。」
絲絲腦入面忽然「叮」一聲，諗到點樣幫Eddie解決跑唔到步返工嘅問題，其實佢可以考慮由渣甸山踩單車去中環，然後游水去尖沙咀，再跑步返ICC，呢個「三項鐵人式」上班方法，唔知佢制唔制呢。
余絲韻