絲絲講場：「洋參大王」講業績夠晒氣
近排唔少半新股爆煲，所以監管機構「金睛火眼」咁（目及）實佢哋，搞到都市麗人（02298）驚青到乜都唔敢講，令成個記招冇料到。
不過有「洋參大王」之稱嘅恒發洋參（00911）主席楊永仁就似乎未驚過，尋日開記招嗰陣一樣可以「口水多過浪花」！
首先洋參大王楊生一開波就話，今年正值公司成立30周年，「人生有幾多個30年？」，所以佢建議派特別息回饋股東，雖然佢無講派幾多，但強調「總之係好多！」之後又力Sell旗下人參副產品，好似最近賣緊嘅花旗參月餅、由野山花旗參釀製嘅白酒，同埋即將推出嘅一系列即食保健品同面膜。
都市麗人口密到離奇
可能就因為咁，搞到另一邊廂都市麗人嗰場就悶爆喇，大家問到任何數字或者預期嘅時候，管理層都話因為公告冇披露唔講得，講嚟講去都係嗰幾句，所以辣慶咗唔少記者，個場面都幾尷尬。
管理層就即刻打圓場話，由於第一次做業績會唔太識，希望之後做好啲喎！
余絲韻