Market Insight：央企重組板塊尋寶

近期主調仍係滬港通，兩隻A股ETF再進佔成交金額首兩位，券商股炒得極之瘋狂，信達國際（00111）再升26%，3日升7成好易發達，連班本地薑如華富國際（00952）、匯富金融（00188）、昌利（08098）等都追落後，時富投資（01049）掛個名亦升14%。

滬港通係唔係咁好搵，要到時先知，但老行尊早就話本地券商或有被中資券商搶生意之虞。其餘光伏股及有色金屬股亦普遍做好，中國鼓勵分布式光伏發電，興業太陽能（00750）升近6%。

古勝冇點你2014/08/07

萬里長空

本土車企競爭加劇

發改委確認12家日本車企價格壟斷，但今次唔係針對日本企業，因為幾間歐洲和美國車廠亦面臨受罰。反壟斷調查最轟動係去年的奶粉「迫降」事件，曾拖累合生元（01112）股價大跌。

中國打正旗號要暴利行業「還利於民」，不過，背後目的可能是爭取籌碼，就如早前調查高通，對方立即與中芯（00981）合作推28納米晶圓製造；而外國車廠近年在華賺個盆滿缽滿，但技術轉讓就相當吝嗇。

外國車廠見風頭火勢，紛紛先行減價，包括捷豹路虎、奔馳、奧迪及佳士拿等，估計寶馬將是下一個跟隨者。不過，合資與本地車廠未必係得益者，進口車減價，意味與本地品牌價格差距收窄，本地車市佔率流失的問題料將更嚴重，睇長汽（02333）、吉汽（00175）及比亞迪（01211）今年上半年業績已有啟示。

至於汽車代理商或更慘，因為車價跌咗，就算毛利率能夠維持，亦代表利潤減少，但若銷量因而增加則可彌補；近年汽車代理商積極發展售後服務，但外國車廠眼見賣車利潤減少，亦會加快向售後市場轉移，逐步推出網上售後服務，對4S店構成競爭。

紅籌股捧場客漸增

近年汽車代理股在香港上市愈來愈多，同是以拓展銷售點為賣點，但招股反應相對冷落，以潤東汽車（01365）為例，只能以下限定價。

中國搞反壟斷就如「只許州官放火，不准百姓點燈」，連完全開放的汽車市場都要管，但多個行業卻由國企壟斷。雖然今年開始玩國企改革，又話玩混合所有制，惟結果甚少民企有興趣參與，變成國企轉讓股權給國企，市場流動性短缺，民企想吞亦吞唔落。

央企重組進行得如火如荼，中信集團以中信泰富（00267）借殼上市，光大集團重組方案獲批，見母公司重組或整體上市方案落實後，香港上市旗艦公司股價多數可以受惠。中信泰富近日股價展強勢，而近日光大控股（00165）表現亦明顯轉強，昨日收市升7%，收報14.26元。

紅籌股炒作重組概念似乎逐漸成為潮流，近月確實見多咗資金入場押注。昨日不乏逆市上升的紅籌股，如粵海投資（00270）股價升5%，收報9.01元；香港中旅（00308）升3%，收報1.98元。

中糧系亦見異動，中國食品（00506）收報3.02元，升5%；中糧控股（00606）收報3.51元，升4%。就連北京控股（00392）都湊熱鬧，升3%，收報71.4元。理論上，上海實業（00363）及同系的上實城開（00563）表現算係相對落後，但究竟係咪問題連「上海」兩隻字都炒唔起，就當古勝懶動腦筋，留待大家估吓！

紙業景氣仍難樂觀

大市維持在高位，好多板塊輪流起動炒作，就算積弱已久的內地資源股亦照炒可也，好似昨日中國鋁業（02600）單日急升9%，真係好耐唔見咁強勢。

不過，有一個板塊都係最好咪沾手，呢個就係紙業股，事關紙業供過於求問題嚴重，未來一年經營環境依然艱難，特別係當今年第三季旺季不旺，大廠開始割價促銷，相信屆時又會淘汰一批細廠，接下來的又係末季年關難過。從行業景氣度睇，今年紙股表現實在難以樂觀，估值難言見底，都係避之則吉。

古勝