絲絲講場：李寧鬥體操輸畀安踏
安踏（02020）中期業績聽日揭盅，估唔到尋日已有好消息搶閘公布，就係首次成為中國體操中心合作夥伴，明搶昔日「體操王子」李寧風頭。不過，李寧（02331）早已明言會整合資源，營銷重點集中番籃球、跑步、羽毛球、訓練同運動生活等五大核心體育項目，所以今次佢哋係自動放棄同體操隊再續前緣。
九○年創業一直拍體操隊
李寧由九○年創業咁耐，就做咗體操隊戰略合作伙伴咁耐，足足有二十三年之久，所以李寧公司同體操隊都算共沐榮耀。可惜今時今日中國體育市場逆轉，李寧唔再單靠純體育贊助策略，決定走上體育營銷、賽事體驗、產品體驗和零售體驗新階段喎。
雖然「人棄我取」，安踏卻直言「係公司機遇」，更形容體操係一個「很安踏」項目。繼中國奧委會的戰略合作後，安踏今年至一七年將為體操中心旗下體操及藝術體操等運動隊提供專業比賽服和訓練服，新比賽裝備好快在即將開幕嘅南京青奧會派上用場。
余絲韻