消息人士透露，正密鑼緊鼓籌備美國上市嘅阿里巴巴擬參與相片分享軟件開發商Snapchat新一輪融資，後者估值可能升到100億美元（約780億港元），唔止高過舊年拒絕facebook提出嘅30億美元收購價，仲同Airbnb、Dropbox、Uber等等新興科企打入百億美元估值「俱樂部」行列。
值得一提，阿里「死敵」騰訊（00700）其實較早前已入股Snapchat，《華爾街日報》分析認為，阿里咁樣係為咗避免兩者加深關係，亦顯示阿里同騰訊競爭白熱化，由中國一直鬥到美國。
據悉，今次阿里洽入股Snapchat，是由一年前成立、由媒體公司Liberty Media前高層Michael Zeisser率領嘅硅谷投資團隊負責。事實上，阿里最近積極喺硅谷搶灘，包括去年十月入股亞馬遜競爭對手嘅ShopRunner，亦參與汽車共享服務公司Lyft Inc最新一輪融資。
收入近乎零嘅Snapchat一直未有披露用戶數字，但研究機構comScore估計，安裝咗Snapchat嘅iPhone及Android手機用戶，由一年前嘅1,100萬激增至2,700萬，每日發出4億條「閱後即刪」嘅短訊或相片，當中喺年輕女性群中甚受歡迎。
另外，即時通訊軟件商Line母公司Naver財務總監Hwang In Joon昨否認有報道指日本軟銀及阿里正磋商入股Line或組成策略聯盟，另透露尚未決定分拆Line上市嘅細節。
余絲韻