期指觀瀾：睇位食胡候低再買
八月期指昨日低位見過24,646點，差6點到達本欄止賺目標24,640點。昨日午後，筆者亦以為限價盤極有可能hit中，殊不知內地股市收市前一刻突然發難，期指也跟隨倒升，日市收24,766點，但成交縮減至5.3萬張。恒指升24點報24,756點，主板成交由前日1,001億回落至840億元。
連升八日的恒指，9日RSI已升至87.5的嚴重超買水平，技術上，恒指一連兩日即市升穿24,111至21,137點跌浪的1.236升幅24,813點，收市卻未能守住，可見這度阻力發揮一定作用。昨日未觸及筆者的止賺限價盤，惟有再坐一會。
由於升市集中重磅落後股，尚未擴散到其他二三線股身上，筆者對今次資金回流中港股市抱有頗大期望，但指數無可能像坐火箭一樣日日升，總會有低位入市的大孖沙，在指數累積升幅唔少下，選擇平倉而對大市造成調整。
事實上，過去二十四年內，八連升只係出現過十八次，換言之，一年都唔逢一潤。筆者基於內地經濟數據初見好轉及港匯偏強，幸運地在大爆發前成功入市，報了上半年幾次誤墮走勢陷阱之仇。假如今日恒指未能企在24,813點樓上收市，會先平倉等回吐再買，但睇升的大方向不變。
John Mullen