Market Insight：和電香港買貨唔使急

不過，聯儲局主席耶倫仲係唔想就幾時開始加息講得太白，等大家自己估，到底一五年頭、年中、定年尾發生。今晚華爾街焦點係七月就業數據，市場估失業率會維持6.1%，非農職位增加23.1萬個，如果達標，會係連續六個月交到20萬個新增非農職位，市場公認支持經濟復甦的基本要求，斷估聯儲局加息壓力更大。

但古勝反而擔心，周初美國公布的五月二十大美國城市房屋價格跌0.31%，是兩年來首次，債息帶住按揭息觸底回升，股市唔多覺，但美樓市已經有負面反應，估計美息即使要加，幅度都會好有限。

利標整固後可再升

真係升到你唔信，過埋期指結算，好友仲係未想停一停，抖一抖，昨日恒指再升24點收報24,756點，主板成交稍減，由前日過千億回到840億元，俗語話「五窮六絕七翻身」，整個七月埋單計數，恒指累積升1,566點。

古勝冇點你

萬里長空

指數升成咁，昨日大市股份升跌股份比例，仲係停留51對49拉鋸局面，證明資金捧落後重磅股，暫時唔理其他增長股、二三線股、國策股的大環境未變。港股上次八連升係講緊一二年十月，嚴格上，當時是十連升，恒指升了910點，相比今次八日進帳1,369點，已經肯定勁過當日。

依家距離後海嘯，一○年的24,988點只係一步之遙，承如在下之前預期，升穿應該係遲早問題，如果今年恒指低位確認21,137點，以過去兩年大市高低波幅都有四千六百多點，今浪指數見25,800點附近，可算是合理推斷，反而近日咁升法，如果可以先來個調整，或者後市會更加健康。

講番股仔，早排提過利豐（00494）分拆出來的利標品牌（00787），近日所見走勢好對辦，相信受條例限制的，原本揸利豐的指數基金，出貨已八八九九，2.1至2.2元之間整固之後，應該有力再上。

加價有助改善業績

買股票，好消息唔升，同壞消息唔跌之中二揀一，當然要睇實後面一類，和電香港（00215）中期成績表其實差到無朋友，純利跌44%至3.23億元，綜合EBITDA都跌20%去到11.81億元，ARPU按年倒退5.3%至197元。

昨日睇番，差過晒大部分外資行預期，公司歸咎智能流動通訊市場價格競爭激烈，期內服務收入倒退11.3%至23.48億元，流動硬件銷售20.9億元，按年有15.2%升幅，但同去年下半年比較卻跌13.2%。

和電昨日股價開3.15元，最低隊落3.03元，把整個七月升幅抵銷，最後拗腰升0.05元收3.33元，一來市場對預期九月底面世，終於肯出大Mon的蘋果公司iPhone 6寄予厚望，其次係PCCW併購CSL後，競爭少咗，近期電訊商陸續以網絡成本高漲為由，紛紛加價，和電被視為壞消息出盡，業績可以在未來兩年回到正軌。

但少隻香爐少隻鬼故事，推動股價由五月初低位2.52元，至今已累積32%升幅，一五年PE 16.9倍，息率4.38厘，合理但未算好平。睇埋對手數碼通（00315）一五年估值相若，PE 16.6倍息率4厘，經過近兩個月升浪，似乎捧場客可以等一等，如果見熱錢轉向流入增長及三四線股，這類被視為防守的股份，或者先有執死雞機會。

落後藍籌留意旺旺

七月份恒指升咗超過一千五百點，論藍籌股，兩隻內房股華潤置地（01109）及中國海外（00688）表現亦出眾，月內累升幅度均逾兩成。至於藍籌食品股旺旺（00151），月內股價跌4%，明顯跑輸大市。當後市升到咁上下，類似旺旺呢類落後藍籌究竟會唔會發力追上，看官不妨拭目以待。

陸續有內地城市取消房產限購令，內房股昨日表現亮麗，其中融創（01918）創52周新高6.46元，收報6.39元，急升7%。月初，有基金大手減持融創股份，作價每股才4.28元，沽完之後，融創股價揚長而去，用差唔多一個月時間翻咗接近半番，真係有人歡喜有人愁！沽貨的基金除咗可以嘆句「無緣」，真係冇嘢好講；但接貨者，短時間坐享可觀升幅，自然飲得杯落！

古勝