最近內地打車Apps咁紅，全靠騰訊（00700）同阿里巴巴激鬥，就連重量級嘅投行界人物－－聯想控股董事長柳傳志個女柳青，尋日亦宣布將過檔由騰訊投資嘅打車軟件滴滴打車，仲做埋首席營運官。柳青嘅投行背景，令市場對滴滴將來發展有唔少「聯想」。
作為內地IT教父個女，柳青喺高盛由分析員逐步升任為該行最年輕嘅亞太區董事總經理，喺私募及風險投資方面都幾出名。柳青尋日形容，加入滴滴後，佢會由職業經理人變做創業合夥人。
絲絲仲注意到，柳青喺高盛任職嘅時候，都有份參與美國打車軟件Uber嘅融資，睇嚟佢加入滴滴亦會參與發展部署，甚至為未來上市鋪路添。
講開Uber，最近着手開拓中港市場，巧合嘅係近日內地傳出，騰訊投資滴滴之餘，仲參與一項名為「U優打車」嘅商務打車軟件籌辦。據報，「U優打車」係由滴滴其中一個副總裁帶領，就目前嚟睇「U優打車」似乎係以Uber為假想敵，如果滴滴對「U優打車」嘅參與係真實嘅話，咁曾經協助高盛投資Uber嘅柳青，或者可產生知己知彼嘅作用喎。
余絲韻