Market Insight：機械股落後唔怕追

昨日恒指開高33點後，好快已經改寫今浪高位，推到上24,501點，收市升212點收報24,428點。大市連升五日，且未見消歇性升市迹象，主板成交854億元，是今轉升浪第二高，僅次於上周四的860億元，連埋ETF創52周高股份90隻，是僅有14隻創新低股份的5.4倍。

藍籌中不得不提兩隻新高股，港交所（00388）見過169.6元，超過三年新高，收169元升3.4%。一句講晒，基金經理相信升市又無特別心水下的必選股；阿里巴巴可能趕唔到八月上市，騰訊（00700）捧場客似乎更加高興，皆因音樂椅遊戲仲可以玩多一頭半個月，騰訊見過129.4元歷史新高，等於拆細前647元！

古勝冇點你2014/07/29

萬里長空

要把握賺大錢機會

唔講唔知，話咁快踏入八月，一四年至今恒指其實累積升幅得4.8%或1,122點，有92.7%即係1,041點，喺過去五個交易日所產生。古勝提出嚟，係想話入市唔在於勤力磨爛席，timing勝過一切。睇番轉頭，經歷六月份唔尋常的低波幅，在在可見基金積累的購買力一直按而不發，從近幾日現貨成交持續高企，期指轉倉也較前活躍，似乎今次強勢延續落去八月的機會相當之大，看官們要好好把握機會，好天收埋落雨柴。

基金股中，達芙妮（00210）昨破位升7.5%收3.43元，第二季同店銷售麻麻，跌2.4%。半杯水可以睇成半滿，瑞銀報告話搵咗《星星》女主角全智賢代言後，同店銷售由第一季跌9.5%，第二季已有所改善，目標價睇4元嗌買。

盈喜股，雲頂香港（00678）預告中期溢利淨額超過1.8億美元，比去年同期2,300萬美元大升6.8倍，主要來自三月出售Norwegian Cruise Line提供1.53億美元一次性收入，以及金融資產重估獲利1,500萬美元，加埋兩條數，條實數其實差過舊年，不過股市有理無理炒咗先，乾升16.3%收3.49元。

半導體業搵食艱難

保利協鑫（03800）預告虧轉盈，由去年中期虧損9.17億元轉為今年獲利不少於8億元，主要歸功於科研創新，提升管理水平降低生產成本所致，昨股價升1.1%收報2.62元，但對比405億元的市值，看來交到一○、一一年度年賺40億元的成績表，估值先返到合理範圍，大行估大約可以在一六年度出現，股價到底太貴定走得太前，看官自己衡量。

內地晶片一哥中芯國際（00981），調高第二季毛利率指引由原先22至24%，上調至27至29%。對半導體產業，在下真係舉手投晒降，資本投入大，產品技術不斷更新兼且不斷降價，生產商長期同單位折舊成本競賽。

好似最近中芯主打28納米晶片，世界一哥台積電已經做緊20納米，甚至開始14納米接單，行業根本係winner get it all的遊戲。龍頭之後幾個玩家，賺唔賺到錢睇行業景氣，排後面的，基本係長期吊鹽水甚至蝕住做。

上星期，○四年坐到依家的基礎股東北大青鳥（08095），在本月十七至二十五日期間，沽咗近6,000萬股中芯，持股量由0.583%降至0.411%。中芯股價在六毫子邊悶咗好耐，六月底炒上，嗰幾日股價介乎0.71至0.79元，其實無乜見過鑊氣，但反映舊股東一樣坐到唔耐煩，亦明白周期股有波幅無升幅，唔再等運到的事實。

三一國際睇位跟炒

A股氣氛好轉，中資板塊輪流起動，內銀、內險、內房及重磅科網股如騰訊等股價反覆向上，強勢畢現，就連估值一向低、行業前景尚不太明朗的煤炭股、貴金屬等資源類股份，呢期都好似食咗大力菜，發力向上。就如昨日中煤能源（01898）現第二支大陽燭，乃繼中國鋁業（02600）、江銅（00358）等，又一隻弱勢股股價成功重返牛熊分界線之上。

若然要繼續發掘低殘股博炒家遲早炒到，可以睇下啲重型機械股，如三一國際（00631）、中國機械工程（01829）、中聯重科（01157）、鄭煤機（00564）等。以三一國際為例，昨日成交增至816萬股，收報1.71元，升1.1%。走勢上，若能以大成交突破50日線1.74元，唔太貪心，細細注博佢跟大隊上番250日線樓上，2元冇走雞，掉頭跌穿52周低位1.67元就沽之哉，計落都值博！

古勝