孖妹S檔案：授你三招破IPO股惑

陳：輝立証券高級企業融資主任陳英傑

李：大華繼顯研究部策略師李惠嫻

股惑一：睇清招股書防「變臉」

Kitty：近年啲半新股愈來愈早「發盈警」，其中綠色動力環保（01330）更只上市二十日！姊妹們個個都喊「怕怕」，仲問：「點解連受惠國策嘅環保股都信唔過？」

李惠嫻

部分半新股股價表現

彩兒：其實新股上市一般會喺招股書提及相關風險，中期盈利大跌咁大件事無理由無預警。會唔會係投資者無認真睇招股書？

陳：相信綠色動力今次「發盈警」跟公司從事「建設－營運－移交」（BOT）業務模式有關，所以唔需要過分擔心。再者，公司喺招股書中其實已經有所披露，作為投資者亦有責任，應該詳細閱讀招股書，而唔係盲目跟風買入股份。

投資環保板塊其實比較長線，反而投資者應留意公司項目發展動態，如有否工程延誤或違約。公司主要從事垃圾發電，由於內地垃圾量多、污染嚴重，所以公司發展有前景，而我對整個環保行業嘅前景都依然樂觀。

李：雖然公司已喺招股書作出披露，但披露位置顯眼度唔高，容易令人忽略。如果有咁重大嘅盈利變動，公司應該喺招股書「概要」部分較前位置闡述，或以「盈利預測」方式向投資者清楚說明。不過，相比其他盈警股，佢嘅翌日跌幅比較少，可能同行業有關。

垃圾發電喺內地屬快速增長行業，前景不俗，所以即使「發盈警」，投資者仍願意畀風險溢價，加上公司規模不算細，未來發展路向亦清晰，其實可以中長線投資。

股價「潛水」損增長信心

彩兒：科網股近月表現明顯「降溫」，就連上月上市嘅暢捷通（01588）同科通芯城（00400）首日表現都「麻麻哋」。但我依然深信科網繼續係今年焦點板塊之一！

陳：科網股通常都高P/E（市盈率），所以風險都會大啲。雖然高P/E往往意味着「高增長」，但股價「潛水」反映市場開始唔再相信佢哋有「高增長」。

李：股份上市首日「潛水」唔等於市場對科網股失去信心，可能只係估值問題，當新股定價近上限就無乜「水位」。衡量股份估值係咪合理時，除咗睇預測市盈率，亦應該睇埋往績市盈率，否則市場對企業預測盈利過分樂觀時，會拉低咗預測市盈率，產生股份「抵買」嘅錯覺。

整體板塊估值目前已回落至較合理水平，所以我仍然睇好。如果企業業績符合市場預期，相信今年內有機會再炒起。

股惑二：勿讓超購錯覺蒙混

Kitty：新股「超購王」、「集資王」同「凍資王」呢啲名我成日聽，好似今年初上市嘅Magnum（02080），超購紀錄高達3,558倍成為「史上超購王」，首日股價狂升近九成，但好快「發盈警」之餘，股價較招股價1.5元計，至今累計跌幅更超過兩成，如果散戶只因認購反應熱烈而長Hold就慘喇！

陳：其實大家都預咗Magnum盈利增長持續性可能有困難，奈何當時新股市場氣氛幾好，所以咪炒起囉，呢個都算係過分炒作嘅例子。仲有，股份集資額細（低於1億元），自然容易「超購」。不過，集資額較細嘅新股，上市開支佔比會相對大，所以公司因為呢個原因令業績「走樣」嘅風險都會增加。

李：Magnum招股書中截至上年八月份嘅首五個月純利已見明顯急跌，當時市場主要係炒佢「細細粒」，集資及發行股數少，上市後容易出現貨源歸邊。

同時，從公司短期業績已見到，其上市開支佔集資額比例大，員工成本、租金開支亦大幅上升，增加上市後「發盈警」嘅可能性。

股惑三：概念獨特 小心高估

彩兒：我發現主板愈嚟愈多業務獨特、「只此一家」嘅企業上市，例如有「中國蘇富比」之稱嘅本港「拍賣第一股」保利文化（03636），又有首隻內地海洋主題樂園股海昌控股（02255）。但原來佢哋上市後嘅股價都持續「尋底」，至今較上市價跌幅已分別近兩成及逾五成！買呢類股份又有咩要留意？

陳：獨特概念股風險一般會高啲，因為市場上未有同業可作業務或估值比較。

李：此類股份打着「獨特概念」嘅旗幟，定價時通常更進取。我建議投資者可將股份與國際同業比較。以上述兩股板塊為例，就可以同紐交所上市嘅蘇富比（Sotheby's）及迪士尼（Disney）比較。

其次亦需要留意企業嘅盈利波動性及營運模式，例如拍賣市道較易受資金流動性及經濟情況影響，而主題公園營運商嘅項目投資期則普遍較長。

長揸與否睇業務前景

彩兒：當下一輪新股潮再現，可採取咩策略？

陳：我預計下一輪新股潮嘅投資情緒，或多或少會受今輪半新股表現參差所影響，而且好難估計邊隻新股會有「發盈警」危機，所以建議散戶認購時都係先抱短炒心態，要嚴守止賺位。如果對公司業務前景有信心，先再考慮長線高持有。

李：依家新股認購反應嘅參考性無以前咁大，投資基本因素及發展前景良好嘅股份更可取。另若公司規模大、於行業具領導地位，則抗逆能力較高、防守性較強。

喺半新股發盈警時，散戶應先了解背後原因：係一次性因素？定係公司核心業務情況已轉壞？

散戶買新股有心得

根據投資者教育中心早前公布嘅《IEC調查研究：金融理財及借貸的知識、態度與行為》調查結果顯示，有27%受訪者認為買新股必定賺錢。

該機構總經理李博衞提醒投資者，認購新股需要支付交易費用，亦唔好假設新股喺掛牌後，股價必定會升越上市價。事實上，唔少新股喺掛牌後股價仍長期維持低於上市價。為免炒新股輸錢，究竟散戶可以如何「拆招」？

唔熟唔食 短炒為上

散戶曾小姐

喺近期新股潮我認購咗三隻股份，全部獲利離場；其中鴻福堂（01446）除認購咗小量股份外，喺上市後即日亦追加2萬股，翌日悉數沽售淨賺逾4,000元。因為有相熟經紀推介，自己又熟悉公司業務，所以先認購。我玩新股一定係短炒，買之前一定要做功課，睇清楚值唔值得投資，唔會做「羊太」！

散戶蔡先生

我好少抽新股，通常等股份上市先買入玩「即日鮮」，因為可以揸得多啲。我揀股從來唔睇咩板塊或認購反應，如果「街貨」太多就好難炒上，況且股份「超購」唔代表開市一定贏。

Kitty、彩兒

若有料報畀彩兒同Kitty或有嘢問，可電郵money.biz@on.cc