Market Insight：網龍利好因素多

半杯水故事，淡友認為升市唔夠全面，對後市樂觀的古勝，反而認為是好兆頭，揭示今浪資金襲港，基金追貨模式還停留在少數大市值股份身上，個市未有耐去到全民皆股，雞犬皆升的境地（在下認為如果連續兩三日過千隻股份上升就要小心），簡單講，個市短期仲未見頂。

美股回軟毋須過憂

受Visa及亞馬遜業績差過預期拖累，上周五美股三大指數統統見紅，道指跌123點或0.72%收報16,960點，可是，美國上市香港預託證券跌幅有限，滙控（00005）、中移（00941）及中海油（00883）三重磅股微升收市，預計今早港股跌幅應在數十點內，美股高位腳軟的衝擊未致太大。

古勝冇點你2014/07/28

萬里長空

踏入七月，汽車股走勢有轉弱迹象，一來，七、八月是內地汽車銷售淡季，逐個月公布的銷售數字，未必會太理想，基金無故事去炒；其次近日大市破位，沽outperformer，買番落後且估值低殘的重磅股成風。第二季汽車股跑贏唔少中資股，順理成章被基金當成ATM。

不過，經過一輪調整，上周五所見似乎短期要沽都沽得七七八八，成個中資汽車股板塊生番晒，吉汽（00175）、華晨（01114）分別升5.6%及4.1%，比亞迪（01211）及東風（00489）都有1.9%及1.8%升幅。

汽車股之中，早前介紹過吉汽，上半年重整自主品牌，銷售唔好大家心中有數，下半年幾款新車推出，會是成敗關鍵，但一句到尾，夠平兼未炒過已值得睇到實。其次係華晨，上半年賣出14萬輛寶馬，按年升37%，半年計已經達到公司一四年26萬輛銷售目標一半以上。最近同寶馬提早延長合資協議十年，去到二○二八年，大行都估佢好快會有新車款技術轉移。

華晨續靠寶馬跑出

有人可能質疑，內地豪華房車市場開始放緩，對於已經擁有極高市佔率的華晨寶馬不利，實情係依家華晨寶馬的X1同3系賣緊廿幾、三十萬人仔，根本同一些中日合資的房車價錢差唔多甚至更低，一六年寶馬合資廠年產能力倍增到60萬輛，可能在下偏見，但銷售可預測度較高，仲係可以睇高一線。

早幾日雲遊（00484）出盈警，又一次證明網上遊戲真係花無百日紅，一隻遊戲即使爆出，都唔可以捱到幾耐，唔信睇下今日仲有幾多人玩緊Angry Bird或者Candy Crush。

網龍（00777）賣掉91無線之後，第一季的營收幾乎都來自網遊業務，主打遊戲《魔域》收入見頂，尚幸《征服》移植到手機平台撐住，舊年116億元人仔出售91無線畀百度的奇迹，可唔可以歷史重演，關鍵是網龍的教育平台K12的發展掂唔掂。

原來百度都做過一個網上教育規模評估，預期明年達到1,237億元人仔。K12又係少數已經手執牛耳的領袖平台，去年的市佔率估計達到22%。網龍其中一個優勢係資源充足，第一季手頭淨現金43億元人仔，約等於53.3億港元，幾乎是72.6億元市值的七成三，如果傳聞押後到九月上市的阿里巴巴有30至50倍估值，騰訊（00700）一四年PE都已經講緊40倍，16倍多的網龍，會係想趁中國科網熱搭搭順風車，又唔想太進取的另一選擇。

資源股成炒家目標

恒指成功突破24,000點，市場交投轉趨活躍，而從市況升勢全面、大價同細價股共舞，可見今次升市唔簡單。好似上周五，兩地股市做好，其中一直呈弱勢的貴金屬同煤炭股板塊表現出眾，雖然有政策消息作引導，但論交投亦確實係近年鮮見，加上就連相關細價股都急升，顯見如今啲錢尤如「餓狼覓食」﹗

好似上周五，三隻大型煤炭股升幅介乎2至5%，但價位較合炒家胃口的恒鼎實業（01393）升幅達8%，收報0.98元。此外，好耐唔見異動的中國秦發（00866），股價亦升11%，收報0.39元。不過，論誇張，都不及同屬資源股的勵晶太平洋（00575），股價飆升23%，收報0.112元，一支大陽燭便脫離仙班，成交3,012萬元，真係愈細價愈好炒！

古勝