NBA球星林書豪吸引到萬千少男少女拜倒喺佢之下。正因為咁，唔少大品牌都搵佢做代言人，又或者投資落佢所屬嘅球隊，好似中興通訊（00763）舊年底就因為咁做火箭隊贊助商。
不過，林書豪嚟緊新球季會轉投湖人隊，咁搵咗火箭隊做代言嘅中興咪好蝕章？
對於林書豪離隊，中興通訊副總裁兼終端亞太獨聯體區CEO張樹民就話無打亂到中興嘅宣傳部署。佢話火箭隊都仲有好多球員受大中華區球迷歡迎，所以唔洗擔心喎。
話就咁話啫，但絲絲都幾戥佢地擔心。雖然佢哋簽火箭隊嗰陣係搵前鋒帕森斯做代言人，但我諗林書豪嘅人氣都係考慮因素之一，依家佢走咗，唔多唔少有影響，而且呢排火箭隊表現麻麻，究竟幫唔幫到中興宣傳手機都係未知之數。
其實呢，啲大品牌諗搵咩球隊做代言人都真係幾頭痕o架，一時又要諗吓啲球星夠唔夠出名，一時又要睇吓隊波表現成點，呢啲嘢真係連神仙都睇唔透o架喎，望就望唔係倒錢落鹹水海啦！
余絲韻