渣打（02888）呢排真係好黑仔，業績差就唔在講啦，仲要連續兩日畀同鄉嘅英國《金融時報》唱衰，要渣打主席剷走CEO，然後主席再剷走自己。出手咁重，渣打要戴穩頭盔啊！
《金融時報》連日引述「內部高級管理層」同埋「銀行同業」，先插銀行市佔降仲準備縮規模，再仔細披露大股東淡馬錫、安本同 Legal & General唔滿意管理層表現。要求主席莊貝思喺一年內踢走CEO冼博德，然後自己了斷，即係叫佢自動請辭。
唔知係咪聞到陣燶味，報道曝光無幾耐，渣打就已經發通告澄清，話董事會全力撐莊貝思同冼博德，絕對無喺投資者施壓下，進行任何繼任部署，仲話會以「極其嚴肅」嘅態度對待繼任事宜。
諗落渣打股東都幾無情，○八年金融海嘯後間間大行都搞唔掂，係得冼博德一手捧起嘅渣打年年賺大錢，盈利連續十年創新高，依家輝煌紀錄「斷纜」無耐，就即時彈人哋各樣都做得唔好，叫莊貝思盡快搵人頂冼博德個位。
英國媒體經常咬住渣打唔放，年初英國《獨立報》已經報過一轉銀行版宮心計，將渣打重組工作形容為殺戮開端，當時財務董事麥定思成代罪羔羊被迫離任，而莊貝思安排李亦思做副行政總裁，係有心想箝制冼博德。
余絲韻