絲絲講場：四成港人退休離港
絲絲一直都好憧憬退休之後可以去台灣種吓菜，過啲簡單日子。有調查就發現，原來都有四成港人考慮唔喺香港退休，比數居然同揀留喺香港退休嘅一樣！原來係怕咗香港嘅高樓價。
美國萬通亞洲訪問咗508個年齡介乎20至52歲嘅在職人士，除咗有兩成人仲未諗掂去邊退休外，四成唔想喺香港退休嘅受訪者入面，就有一半揀去台灣或者內地退休。
樓價貴兼通脹累事
究竟因咩原因令香港咁趕客呢？美國萬通亞洲市務部高級副總裁蕭莉玲（Jeanne）就估計，近年香港樓價同通脹率係咁升，大家眼見生活指數愈來愈高，所以先轉移陣地去附近退休。
23%人擔心太長命
呢個結果都幾Sad，更Sad嘅係，香港人對於退休生活真係無咩信心，10分滿分先得5.5分，叫做勉強合格。當中有61%受訪者就話自己最擔心通脹同失業問題，驚自己太長命嘅都有23%。
其實講到尾，唔敢退休都係全因一個錢字。Jeanne幫絲絲計過條數，如果想喺57歲退休，起碼要儲800萬先有得傾，而且話唔埋絲絲長命百歲，仲要額外搵多百幾萬啊！
絲絲奉勸一班後生仔女，都係早啲儲多個錢傍身，再唔係就學Jeanne咁，廿歲女嗰時就已經買落儲蓄保險，先追得上通脹啊！