匯海策略：紐元再藉加息炒上
如果睇世界各地新聞，現仍聚焦馬航客機在烏克蘭被導彈擊落的新聞。不過，如果大家睇睇金融市場，則觀察到除歐元區部分國家債息輕微回落外，匯市及股市所受影響其實微乎其微，故建議投資者應將心思放在外幣基本面上。
昨日歐洲市初段只有紐元最「有景」，其他外幣波幅不大。講到尾，資金都係炒周四新西蘭儲備銀行會進一步加息0.25厘至3.5厘，使紐元繼續成為已發展主要貨幣國家中息率最高者。
事實上，一眾外幣各有內患，如美國未有加息時間表；英國九月有蘇格蘭獨立公投日；歐元區有歐豬國家拖累；澳洲雖則話今輪減息周期應已完結，但要加息就仲有一段日子；日本就更加心照不宣，經濟底子仍弱。由此可見，綜觀上述貨幣中，估計年內就只有紐元可以加息，在此情況下，又如何叫「好息之徒」放過紐元呢？
走勢上，紐元上周尾段輕觸50日線後反彈，昨高見0.872，加上9日RSI回升至41，可考慮吼位買入紐元，博彈番前高位0.8836就已有過百點子利潤，跌穿0.865止蝕。
阿Lam