孖妹S檔案：「桌」越財情 顯贏面

馮雪心 石碑古文字象徵事業

康宏理財（01019）行政總裁 馮雪心（Rosetta）

外國彈性辦公中心盛行，旨在慳租同有效運用公司資源，我哋用折衷方式，摒棄咗獨立坐房文化，管理層坐埋一間房，仲設立每日清理枱面嘅規定添！依家管理層溝通快咗，未完成嘅工作亦更加一目了然。我枱上有一塊羅塞塔石碑（Rosetta Stone）嘅小型仿製品，我個英文名就係源自呢塊石，上面嘅古文字好似象徵住我嘅事業，同埋公司喺行業嘅領先地位。

郭小菱

謝汝康

彩兒評價

聽聞你哋主席王利民經常唔聽話，無清枱喎，哈哈！

溫天納	潘鐵珊	潘玉琪

郭小菱 睇8個「芒」 數據盡握

法巴股票及衍生產品部執行董事 郭小菱

我每日喺一片「芒」海中工作，枱面有八個顯示屏，我會用嚟睇網上新聞、監察公司網頁及旗下窩輪、製作及閱讀數據表，及留意市場數據，其中六個「芒」會比較常用，其實比起Trader（交易員）就濕濕碎啦。因為Trading Floor（交易場）好Open，同事經過時會睇到辦公桌上所有嘢，所以我啲私人嘢都盡量放喺屋企，囡囡嘅相就惟有喺手機睇啦！

Kitty評價

咁多個「芒」，真係睇到頭到暈。

謝汝康 常備維他命增戰鬥力

富時亞洲區董事 謝汝康

我忍受唔到喺「文件森林」工作，所以張辦公枱較簡潔，正因做指數業務，工作計量化，加上我喺位嘅時間多數用嚟講長途電話同覆電郵，需要絞盡腦汁，好彩個位對住無敵維港景，間中可鬆一鬆。因工作太忙，又經常要公幹，飲食唔均衡，我會食維他命B提神、食維他命C提高免疫力，電腦側會長期放兩樽維他命傍身，要有恒心日日食，先可將藥箱變成首飾箱！

彩兒評價

我呢排崇尚生機飲食，睇大市數據都精靈咗，希望可以好似你咁有恒心啦！

溫天納 全電子化 一張紙都冇

資深投資銀行家兼中國人民大學講座教授 溫天納

我一向崇尚簡約，平時會將大部分文件電子化或放喺檔案室。好多朋友嚟到都嚇一跳，以為我辦公枱會放滿自己嘅獎項及書本等，不過工作地點對我而言係見客、寫工作報告嘅地方，其他物品都會放喺屋企，而且客人睇到機密文件會好奇，更加需要收妥，工作枱要簡而清！

Kitty評價

喺你枱面真係一張紙都見唔到喎，睇嚟時下嘅科技幫到你唔少！

潘鐵珊 擺領呔陣 茶具傍身

海通國際證券環球投資策略董事 潘鐵珊

我嘅辦公枱上有近廿條領呔，事關大熱天時，多數返公司先打呔，而且我一日要上幾個節目，所以會換吓呔，冇咁單調丫嘛！我係「Tea Lover」，所以長期都會放一套茶具喺枱上，不時會沏茶嚟提神靜心，分析市場會透徹啲，最近推介的AH折讓概念股、內房及部分落後板塊均表現生性，遲啲得閒啲我就會去考評茶師資歷。

彩兒評價

如果早排聽你指點做定功課入市，應該都幫補到我哋飛去南韓見下啲「OPPA」。

潘玉琪 3部計算機加兩張相

香港財經資訊及教育（HKFIE）研究部主管 潘玉琪

我嘅辦公枱有五部顯示屏及三部計數機，不過我放咁多部只係個人習慣啫，主要係用嚟分析數據，其實唔少職業炒家只係用一部電腦，甚至一部平板電腦走天涯o架！早年我做過財經記者，所以枱度放咗兩幅當時做重要訪問嘅相，受訪者係恒基地產（00012）主席李兆基及長實（00001）副主席李澤鉅，係用嚟提醒自己當年好勤力，每日只係瞓四粒鐘，以提高自己的成就。

Kitty評價

瞓得嗰四粒鐘咁少，唔怪得你做到期權同期指專家啦！

林偉雄 牛熊毛公仔陪住睇市

晉裕環球資產管理投資研究部董事 林偉雄

我個顯示屏上放緊兩隻對峙中嘅牛熊毛公仔，係以前參觀紐交所時買嘅紀念品。我個人投資傾向「牛」啲，即係側重長遠看升嘅多元化長年期投資，包括股、樓、債及小朋友嘅教育基金。我相信滬港通嘅推行，中央或會推出更多微刺激經濟措施，有助推動大市，加上港匯續強，促資金流入港股，料第三季末起表現會更好，今年恒指上望24,800點。

彩兒評價

你平時咁「Man」，真係勢估唔到你會儲公仔啊！

若有料報畀彩兒同Kitty或有嘢問，可電郵money.biz@on.cc