Market Insight：手機股輪流發力

上周五恒指亦只係輕微回落66點，最後收報23,454點，期指夜市已拗腰回升66點，反映今早港股好大機會收復失地，彈番上23,500點樓上再玩過。

失蹤的MH370都仲未搵番，如今又有MH17遇襲，本身早就負債纍纍的馬航，一年之內經歷兩次航空史上的重大慘劇，如今日日「吉」機燒150萬美金，睇怕再咁落去，三至六個月內馬航手頭資金將會耗盡，如果持有七成股權的馬來西亞政府投資基金唔揼水，估計最終得倒閉一個結局。

古勝冇點你

萬里長空

上星期收市後，東航（00670）出盈警，預告上半年盈利會降至5,000萬人仔之內，相比去年同期的7.63億元人仔，真係連零頭都無。同南航（01055）情況一樣，因今年初人民幣貶值，令東航手上外債錄得匯兌損失，其股價由去年底高位3.29元至今累積跌逾兩成，預期市帳率0.91倍，貼近十年低位。

航空事業唔易做

注意到，上周初南航盈警後，東航股價反而級級上炒番轉頭，一來市場預咗上半年盈警，壞消息出盡；其次人民幣貶值步伐近日停咗落嚟，下半年外債匯兌損失應該收斂，有得博吓。

飽受疫症、恐襲加埋環球經濟乍暖還寒的折磨，近年不論成熟市場還是發展中國家，航空事業都唔易做，依家魚缸入面，又有咁多低殘的中資周期股，要唔要揀航空股嚟博，先至係最難決定。

被SCA（愛生雅）收購後，維達國際（03331）終於有着落，以11.44億元現金收購SCA在中國、香港及澳門的商業營運業務，包括可免專利權費的基礎下，取得港人熟悉的「Tempo 得寶」品牌在中國、香港及澳門的永續及獨家使用權。另外，交易包括「Dr.P 包大人」及「Sealer 噓噓樂」的擁有權，以及「TORK 多康」、「TENA 添寧」、「Libresse 輕曲線」及「Libero 麗貝樂」的中、港及澳獨家使用權。受消息刺激，上周五其股價升3.4%，收報11.98元。

買維達要睇長線

單睇收購的愛生雅生活，去年賺得2,314萬元，交易唔算得上好平，不過平心而論，好難純粹以PE計交易抵唔抵，事實SCA去年斥資88億元收購維達，就係因為本身在內地發展麻麻，想借助維達的銷售渠道，在大中華拓展旗下品牌，希望一加一大於二。最後如意算盤打唔打得響，仲要睇入主後，管理班子執行力夠唔夠。今日買維達，無疑係信SCA在11元入貨番嚟，唔會畀佢衰得去邊。

睇番上半年維達成績，純利2.22億元，按年少賺21.8%，每股盈利22.3仙，中期息每股派4仙。由於公司大部分交易以人民幣計值及結算，借貸則集中港元及美元，單是人民幣貶值，已經使外幣匯兌虧損3,340萬元，相對去年同期則有匯兌收益3,140萬元，一來一回成為業績倒退的主因，但大致在市場預期以內。

上半年短纖價格回落，提高採購比例，應有助紓緩維達下半年的成本壓力，下半年業績斷估可以好番些少，預期市盈率22倍，捧場客可能要有較長線持貨等成績浮現的心理準備。

中興受惠4G商機

上周手機股輪流發力，先係晨訊（02000）、繼而係通達（00698），之後輪到TCL通訊（02618）上周五破頂，高位見10.84元，收報10.68元，升幅9.5%，已上車者可穩坐釣漁船。此外，中興通訊（00763）嚟緊亦會積極拓展4G手機業務，上周初股價曾急升，見16元水平現承接，相信整固過後股價可繼續反覆試高位。

呢期細價股多人關注，就繼續發掘可取對象。純睇走勢，中芯國際（00981）上月下旬開始打破悶局，本月初升抵0.7元樓上後進行整固，似乎唔多跌得落。公司將於下月六日宣布業績，不妨留意此前會否先開轉快車，若能以大成交突破0.78元，下一個目標睇52周高位0.88元；但若然掉頭回落並失守0.7元，則宜先行離場觀望。

古勝