世界級富豪嘅身家變化，好睇佢哋做嘅行業，係咪食正經濟周期。
財經雜誌《福布斯》最新嘅排名榜，由墨西哥電訊大王斯利姆（Carlos Slim）奪得，但呢排電訊業唔係當道吖，何解由斯利姆奪冠？原來係有少少「符碌」嘅。
話說斯利姆早前為咗回應反壟斷訴求，同意分拆佢嘅電訊王國，旗下美洲電訊（America Movil）喺墨西哥同紐約證券交易所上市，之後隻股票股價大升，帶挈斯利姆身家亦都水漲船高，兼且以一個馬鼻超越今年全球首富、微軟創辦人蓋茨。
呢個排名係計七月一日至十一日，同一年一度嗰個排名有啲唔同。斯利姆持有美洲電訊一成，隨住股價上升，推動斯利姆身家由745億美元增至796億美元，反映投資者亦支持分拆電訊王國嘅決定。
以今個星期二收市價計，公司市值去到1,076.2億美元（約8,394.36億港億），股價年內升咗超過一成。
喺《福布斯》今年三月公布嘅「2014年全球富豪榜」，蓋茨以資產總值760億美元登上首富之位，而斯利姆就以720億美元身家屈居第二位。
斯利姆喺一三年因為美洲電訊股價大跌，令佢失落《福布斯》全球首富寶座。
余絲韻