Market Insight：建滔板潛力優厚

耶倫講話令納指隔晚由升轉跌，更令古勝想起一件往事，耶倫唔係首位聯儲局主席兼任股市評論員，史上最經典係一九九六年十二月五日，前兩任主席格林斯潘，當年以Irrational exuberance（非理性亢奮）去評論當年股市，結果係點？當時納指在1,300點，唔上唔落個零月，之後先至精彩，一直狂奔去到二○○○年第一季科網熱高峰，無人再理PE、PB、PEG，大家用網站hit Rate，吸引眼球數目去計科網股的市值，納指升到史無前例的5,132點先肯爆煲。

中國經濟有晒劇本

在下近日睇了一輯紀錄片，講述當年聯儲局為非理性亢奮的華爾街，傾過可以點做，有委員提議提早加息篤穿個大泡泡，但從來補鑊容易，防患未然卻知易行難，最終被大多數委員否決。

古勝冇點你2014/07/17

萬里長空

耶倫當年位居聯邦儲備委員會委員，有冇份參與會議？並無深究，但由納指喺格老話好貴之後，再升多294%，講出事實，就算一人之下，權傾全球金融系統的聯儲局主席，亦不過凡人一個，無預知未來之能力，耶倫的建議大家可以參考，但亦唔需要過分上心。

中國第二季GDP增長有7.5%，比市場預期理想及第一季的7.4%回升，工業增加值升幅同樣是勝過市場預期。四月內地樓市腳軟，擔心拖累經濟的悲觀者，包括在下，睇嚟統統要配個副眼鏡。

樂觀角度，人行五月推「定向降準」，推動五、六月新增貸款超額完成，截至六月底止係5.74萬億人仔，比去年5.08萬億人仔高出近一成三，加上出口保持單位數穩定增長，以及下半年中國鐵路及基建投資加快，成台戲仲係按住中央保全年GDP 7.5%的劇本進行。

有大行調查顯示，上月環球基金手頭的淨現金水平去到4.5%，是過去十三年紀錄以來第二高，隨着中國經濟硬着陸機會降低，短期會吸引更多資金，由成熟市場回流發展中市場，尤其中國，近日市場預期下半年中國全面降準甚至減息，看來第三季成事的可能變得渺茫。

食正智能手機熱潮

昨日港股升63點收報23,523點，主板成交稍增至534億元，是五個交易日以來最多。不過，見藍籌升幅排頭位居然係中信泰富（00267）及中國旺旺（00151），就知個市幾咁缺乏故事。

央企改革概念股繼續做好，中國建材（03323）、中糧控股（00606）以及中糧置地（00207）都見追捧，對於重視基本因素的保守投資者，炒央企改革概念真係唔易買得落手，管理及經營效益愈好的，可以改善空間就愈細，同近日炒AH差價股一樣，衰啲講就係愈垃圾愈無人吼先愈炒得勁，老實講真係買唔落手，古勝純粹得個睇字。

外電爆蘋果公司iPhone 6可能九月底正式開賣，但4.7吋及5.5吋屏幕兩款機種，話後者可能遇部件短缺問題要押後，真定假都好，一日未出街，iPhone概念仲係有得炒。昨日信利國際（00732）、瑞聲科技（02018）及富智康（02038）都見做好。其實瑞聲同富智康兩隻工業股，講到底都係因為iPhone概念先可以攞到咁高PE，如果搵隻平平地又食正內地智能手機概念的股票，建滔積層板（01888）會係其中一個吸引之選。

業績勢必重拾增長

公司乃中國最大印刷線路板生產商，亦即係所有電子產品都用到的PCB板，過去兩年業績無乜增長，主要是個人電腦及手提電腦出貨量呆滯所致。

調整產品結構後，建滔板今年開始受惠於內地智能電話出貨量三級跳的好處，控股公司建滔化工（00148）六月兩次以2.856元及2.886元增持，持股近爆燈的74.59%水平。

建滔板現價3.01元，距離母公司的增持價唔太遠，一四年PE 6.7倍，估計有6.4厘股息，估值亦較五年平均8.7倍低兩成三，一四年按預期重拾增長，在下認為現價係風險細且潛力大。

古勝