孖妹S檔案：財經作家教你喜閱創富
電視節目「百萬富翁」曾經風靡全港，將「知識就是力量」呢句格言發揚光大，而孖妹亦深信知識足以讓人致富。適逢七月書展又到，孖妹搵嚟三位唔同背景嘅財經書作者，分享依家邊類財經書至搶手，以及佢哋對閱讀和投資嘅個人見解。
講理財融入生活議題
李：中大酒店及旅遊管理學院會計及財務高級講師 李兆波
Kitty：「交男女朋友時的盡職審查」、「Working Holiday的利弊」這些網上專欄夠晒入世，估唔到係由大學講師執筆，你寫嘅文章甚有個人風格喎！
李：喺讀書年代，我已經比較「拿手」寫議論文，所以依家有機會寫吓評論，我都會多寫同社會相關嘅議題。寫作帶畀我好大滿足感！依家讀者層面多元，雖然人人立場唔同，但寫作可以提供正面討論嘅機會，對各方都有建設性。
彩兒：我記得你以前都多次出書教人「慳錢」同理財，見到近年坊間嘅財經書籍，題材幾乎都如出一轍，你覺得要點先可以吸引讀者？
李：如果個個題材都一樣，就未必有Market，尤其喺金融海嘯後，大家都對金融市場產生咗負面印象。我覺得需要寫啲特別嘅個人分享，例如「中產理財」或「海外置業」等先夠吸引，寫作手法要傾向分享性，先容易令讀者有同感。
其實依家好多年輕一輩都家境唔錯，佢哋學投資唔單止為賺錢，可能係想增加財富後，可以改善人際關係，或想貢獻社會。佢哋想要非單純技術層面嘅嘢，所以要吸引讀者，書本內容要再人性化啲，諗吓讀者投資背後嘅目的。
年輕人靠創業致富難
彩兒：本港金融市場發展迅速，年輕人投資致富機會理應比往日大增，但市場又好似比以前更複雜更難預測……
李：的確，依家嘅市場資訊及金融產品都多咗，但能夠得到合理回報嘅人就唔多。好似會計呢行咁，已經無以前咁風光，要好努力先爭取到合理回報，因為從業嘅人多咗，但人工升幅就放慢咗。而且內地將來可能唔准香港會計師核數，令行業政策風險增加。
Kitty：好多年輕人都想以創業賺取人生「第一桶金」，你又點睇呢？
李：我唔鼓勵年輕人創業，因為店舖租金殺傷力好大。就算你搞網上生意，依家資訊發達，競爭好大，產品容易被人複製，而且你係咪真係有咁多客源呢？如果你打算賣啲好獨特嘅產品，好似手製曲奇咁，都一試無妨，但我建議創業初期都係唔應該太快辭職。
出書教買英樓益街坊
鄭：網誌《九十後投資記》Blog主 鄭嘉瑋（Ricky）
Kitty：聽聞你年紀輕輕已經同屋企人喺英國合資擁有四個物業單位，仲出埋書教人「買起英國樓」，點解你肯咁大方同人分享？
鄭：我自小已被屋企人灌輸「有錢齊齊搵」嘅心態，毋須收收埋埋，可能都同我哋係潮州人有關係。依家我哋坐埋一齊食飯都成日傾財經、投資呢啲話題。當初我向家人提出想合資投資英國樓嘅想法，佢哋都好快就答應，連細節都係簽約後先再慢慢諗，真係好多謝佢哋對我嘅信任！
Kitty：你今次話晒都係第一次出書，會唔會擔心銷量唔好？
鄭：唔會啊，我喺網誌上已經累積咗一班固定嘅讀者群，部分網友對投資英國樓好有興趣，當中有年輕人亦有中年人士，成日都會喺網誌上問我有咩建議，所以我先決定出本書，一次過解答晒佢哋嘅疑問。而且，他們思想都好開放，唔會因為我年紀輕而唔聽我意見。
Kitty：對於你嚟講，買樓置業係咪好容易？你又認唔認同年輕一代比上一代更難「上車」？
鄭：我覺得只要肯儲錢、肯自己努力，要買樓唔係咁難，雖然我依家都只係「靠屋企」，我認。我亦唔覺得年輕一代比以前嘅人更難「上車」，佢哋以前買樓都有好多風險，例如九七回歸、沙士、暴動，而且以往嘅監管制度亦無今日咁完善，所以我覺得唔係年代嘅問題，而係有無決心同需要嘅問題。但我同屋企人仍然相處得好好，暫時未打算自己搬出去住。
投資為人生大事準備
Kitty：既然你未有置業大計，咁你投資嘅動力係咩？
鄭：投資係賺錢嘅機會，可以幫你提早儲起足夠資金，以備將來不時之需。我覺得買樓並非投資單一目標，創業、結婚等人生大事都需要錢。當你能夠愈早準備，就愈容易準備得更好。
Kitty：閱讀真係可以增加投資成功機會？
鄭：除咗財經書籍，其他種類嘅我都睇，比較喜歡網誌、新聞等生活化資訊。我覺得唔單止閱讀，任何資訊都係重要嘅，可以令自己不致與時代脫軌，而你學到嘅嘢，亦唔知將來投資時幾時會用得着。
Kitty：你未畢業就已經每月有近5萬港元嘅穩定租金收入，「打跛腳都唔使憂」啦！
鄭：我始終覺得需要工作，要服務社會，唔想做蛀米大蟲。
專業炒家寫操盤秘笈
麥：富昌金融集團聯席董事 麥振威
彩兒：你由○二年至今已經出版超過二十本財經書籍，內容非常廣泛，由投資股票、窩輪到牛熊證都有，「大包圍」係咪你嘅出書策略？
麥：因為我真係乜都炒！而且，我覺得一定要帶畀讀者新知識，先可以吸引佢哋捧場，所以我上年推出嘅《全職操盤》，係全港第一本講解程式交易嘅書籍。嚟緊出嘅新書都會同程式交易相關，例如係程式選股、交易美國期油等。
彩兒：到底程式交易有咩咁特別？
麥：程式交易喺香港市場尚算「新鮮」，但其實喺台灣、美國已經好普遍。依家啲散戶已經變得叻咗，投資時唔想再單靠市場消息，想測驗出一套自己嘅策略。運用程式交易，可以利用程式編寫個人投資策略，比自己分析圖表走勢更慳時間之餘，亦由於交易係全自動化，所以可減少因心急、貪念而造成的「人性」失誤。
大眾化書籍難再大賣
彩兒：你涉足財經出版界咁多年，覺得依家出書同以前有咩唔同？
麥：以前講吓平均線、教人睇吓圖已經可以寫書，但依家嘅出版內容傾向專門化。例如我寫程式交易，都要自己學識點用先寫到，所以寫書嘅前期準備工作多咗好多。反而大眾化嘅書籍未必可以大賣，因為讀者自己上網都搵到資料。其實我喺今年三月曾經到訪台灣了解當地財經書籍出版情況，我相信未來香港市場會同台灣相近。
彩兒：你自細鍾意睇財經書籍，咁揀書有咩準則？
麥：我揀書睇時，好多時會先留意作者，例如Michael Lewis。佢每次出新書都令整個華爾街震撼，由一九八九年撰寫嘅首本書籍《Liar's Poker》，到今年剛出版嘅新書《Flash Boys》，都係我個人喜愛嘅財經書籍之一。另外，我亦推介由Jack D.Schwager撰寫嘅《Market Wizards》，書內訪問咗多位交易員嘅投資心得，相信對投資者有好大啟發。
若有料報畀彩兒同Kitty或有嘢問，可電郵money.biz@on.cc