期指觀瀾：波幅窄炒家難搵食
上星期外圍股市反覆，葡萄牙大型銀行BES違約，引發歐美股市一輪震盪，港股卻不為所動，上周五恒指最多跌過92點後，曾經倒升69點，收市跌5點，收23,233點，主板成交稍為回升至514億元。國指表現較佳，升11點，收報10,379點，全周計，恒指跌313點。
近期港匯的強勢，同港股的牛皮局面形成強烈對比，以往港匯轉強，大家都預期港股多少能夠受惠，近日金管局多番入市干預避免港匯升穿7.75算之下，港股卻持續四、五百億元成交。到底大量熱錢停泊本港所為何事？答案像謎一樣，但見上周中原編製的地產指數與歷史高位一步之遙，莫非熱錢揀磚頭而放棄股票？
今年期指客如果把握唔到第一季的W走勢，基本上好難有運行，六月份成個市得595點波幅，堅持日日炒過至心息，隨時多做多錯。
睇番大市自○七年高位31,958點，跌至○八年10,676點海嘯後低位快將六年，港股每年的波幅有愈玩愈縮的趨勢，每次逼近23,800至24,000點阻力，都捱唔耐又再腳軟，雖然同滬綜指比較，恒指已經算有交代，但對於唔理升跌，最緊要有波幅，更好是有單邊市出現的期指客來說，對住這種悶市，真係有苦自己知。
John Mullen