Market Insight：殼股尋寶 難度極高

上周五，港股不為所動，僅微跌5點，收23,233點。近期港匯強勢，金管局要多番入市干預，港股應升唔升確實古怪。有意見認為熱錢係部署等滬港通開車，至入市大展拳腳。客觀睇，依家至七月中，距離滬港股市互聯互通仲要等兩個多月，唔多講得通也！總之一日唔升穿23,500至24,000點阻力區，繼續摸住石頭過河。

人仔兌美元由年初高位6.039，四月落到最低6.267，貶值超過3%，借外債的企業自然叫晒救命。自匯改後人仔持續升值，外債變相縮水，但如意算盤如今突然唔再打得響。南方航空（01055）發盈警，受人仔貶值及內地經濟增長放緩雙重打擊，預料上半年將由一三年賺3.02億元人仔，變成虧損9億至11億元人仔。

古勝冇點你2014/07/14

萬里長空

內房外債存隱憂

尚幸南航股價由去年的4.68元撻落六月初2.2元，累跌53%之後，應已反映大部分不利因素，近期股價反而趁人仔回穩反彈，現價0.56倍市帳率，算可以接受。但今次事件就令人聯想到，近年狂發美元債券吸水的內房企業，近日因為炒家賭地方政府微調限購令，對沖基金紛紛押注而反彈，佢地開始踏入中期業績前的預警期，部分或者有機會好似南航咁，為外債匯兌損失作出預警。

老早講過，特區政府一堆需求管理辣招，在真真正正有新供應推出之前，睇死佢最叻都係減慢樓價上升步伐，但唔可能扭轉因供不應求所引致的上升趨勢。

早前政府修訂DSD，畀換樓客更大彈性的措施，唔知算唔算財爺口中的「好心做壞事」，個市當正辣度見頂，壓抑的需求一下子釋放，反映二手樓價的中原城市領先指數，上周飆升至123.35，只差些少就返到一三年三月歷史高位123.66。

過去一年，N咁多間大行唱香港樓市要跌至少一至兩成，結果有目共睹，單係估美國退市，年年話退，年年未退，美國加息得個講字，華爾街估就算聯儲局郁手，一五年終利息都只係會由0至0.25，上番去1厘，升幅有限。另外歐、日兩大央行未有耐收水，中國下半年又可能開水喉，全球水浸時間恐怕要比任何人估計都要長。

信置折讓夠吸引

睇番香港，市民對政府兌現增加供應承諾亦愈來愈懷疑，單睇極具爭議的新界東北發展，去到二○三一年所有工程完工，可以供應5.4萬個單位，住到15萬人，但唔好忘記，這十七年，單是每年5.4萬個單程證配額，已經講緊有91.8萬新移民要解決住屋需求，要搵多六個新界東北出嚟至搞得掂！

家陣新樓閒閒地實用呎價萬多兩萬，以舊年香港家庭收入中位數22,400元計，就算撇除近半住公營房屋人口，當佢44,800元，但400呎上車盤隨時盛惠六至八球，相當於百幾個月的家庭收入！在呎價愈飆愈高之下，最近發展商把大單位套房間成200呎樓下的studio出售，變相降低上車門檻，相信這股潮流會繼續蔓延。講番地產股，一直等落後的新世界發展（00017）開車，但彤叔系有時真係估佢唔到。至於早排因白石角地皮成交價遠低於預期而被拖低的信置（00083），依家樓市景況擺在眼前，實在無理由唔貪折讓夠大，揀埋佢。

久聞樓梯響，內地三大電訊商中移（00941）、聯通（00762）及中電信（00728）落實共同成立中國通訊設施服務公司，註冊資本100億元人民幣，後者主要參與鐵塔建設、維護及營運，以及基站機房等設施興建，減低三者重疊的基礎建設投資。

股仔進佔升幅榜

獲青島城投入股兼以溢價提全購的華脈（00499），上周五復牌股價大漲，高位見4元，收報3.45元，升146%，成交7,793萬元，難得係信者得救，上晝肯上車的話任你買，下晝就可以施施然沽貨食胡。魚缸出現咁大隻「蛤乸」，真係好少見！

同日，合富輝煌（00733）獲搜房入股，股價曾飆高四成。先後有二、三線股被「點石成金」，估值低迷的股仔頓成股民尋寶對象。好似上周五主板升幅榜中，E-KONG（00524）、新威國際（00058）、科浪國際（02336）、茂盛控股（00022）等，相信都係炒家冷敲之下的異動股。

但當然，若然唔係春江鴨，玩呢類尋寶遊戲，要成功贏大錢的難度極高，更何況呢類股唔少交投都係長期低迷，一旦真係押錯注，要落車亦唔容易，落場投機跟進亦只可細細注就住玩，可以話係追求押中寶的成功感多於回報率！

古勝