絲絲講場：「神奇小子」加入上市委
港交所（00388）尋日公布新一批上市委員會名單，換入五名新成員，當中最矚目的應係有「神奇小子」之稱嘅Janchor Partners創始人兼投資總監何志安（John Ho）。
年僅37歲嘅John，喺金融界已大有名堂。自立門戶前，曾任兒童投資基金（TCI）香港辦事處的亞洲投資部門主管，更曾代表TCI加入領匯（00823）做非執董。佢離開TCI後成立對沖基金Janchor Partners Pan Asian Fund，首年就以35%回報成為一○年其中一隻最賺錢嘅對沖基金。
下月上市委員會將召開最新季度政策會議，或會為備受市場爭議的「同股不同權」架構諮詢作最後拍板，唔知「神奇小子」會點睇呢？
五個新面孔 超預期
至於另外四名新加入者包括高盛投資銀行部董事總經理Daniel Swift、另類投資管理協會香港分會主席兼全球理事會成員Philip Tye、畢馬威香港首席合夥人韋安祖及希慎興業（00014）執行董事容韻儀。
今次上市委「換血」數目比市場預期多，事關今年其實只有一名成員祁以成夠六年任期要離任、加上馬雪征獲委為證監會非執董而於去年十一月辭任上市委成員，故「理論上」今年應只有兩名人士需換入。不過，上市委員也可能因各種原因，如業務繁忙、自願唔做等，不再續任。
余絲韻