亞馬遜早前講咗個新大計，就係用無人機嚟送貨，之後好多公司都話會投放資源落去無人機生產方面，一時之間成為潮流。點知美國聯邦航空局（FAA）喺最新嘅諮詢文件入面就話，無人機暫時都只會用喺興趣同娛樂方面，莫非就咁將亞馬遜嘅計劃打沉？
FAA希望公眾就住無人機政策畀啲意見，今年年底會重新傾吓啲細架嘅商用無人機申請個案，下年年尾或者再公布新規則。
唉，咁搞法亞馬遜真係陰功咯！佢哋本來雄心壯志，行政總裁貝索斯近期先話過，公司已經測試緊第五同第六代飛機，更多型號已經進入設計階段，以為無人機就快可以投入服務。
雖然FAA咁講，但係亞馬遜就未驚過，發言人話FAA個報告係針對娛樂性質嘅無人機，所以完全唔會影響到公司研發商用無人機嘅計劃喎，仲話，佢哋架無人機只需要三十分鐘就可以將貨物運到客人手上，睇嚟信心完全無動搖喎。
其實除咗亞馬遜之外，仲有其他公司研究緊商用無人機，DHL就係其中一間喇，睇嚟FAA要認真啲諗吓商用無人機呢個問題喇，始終好影響到人哋生意嘛。
余絲韻